نوم طول الوقت، أو مفيش نوم لأيام
عياط وماليش نفس لحاجة، لأي حاجة، حتى النَفَس نفسه مش طايقاه
مش عارفة أشوف شغلي
مش طايقة أي حد
بـ اسقط في دراستي كتير، بـ اخسر صحابي
مش لاقية حد يفضل، وعندهم حق
أنا مش قادرة أفضل معايا.

النوم صعب، الصحيان تاني يوم أصعب
"ليه؟ هو في إيه عشان كل ده؟"
"إيه الضغوط الـلـي عليكِ يعني؟"
"ماعرفش!"، دايما ده ردي.

أنا بـتعرض لـتـنـمُّـر وإهانات
زي إن مرة مدرس مادة الدين قعَّدني قدامه بطريقة غير مباشرة عشان يقرا عليا الرقية الشرعية، قدام كل الـ classmates
وكان متِّفق معاهم عشان شايفين اختلافي عنهم خلل
وما أقدرش أعمل حاجة
ولما اتكلمت، اتقال ده هزار.

من تلت سنين فاتوا في نفس يوم موت صديقتى المفضلة والأقرب لقلبى،
خرج خطيبى وحبى الأول من حياتى برسالة بعتهالى على واتساب بدون مقدمات:
"أنتِ جميلة وتستاهلى حد أحسن منى، خلى بالك على نفسك علشان خاطرى"
بكل بجاحة حلفنى بخاطره علشان أحافظ على نفسى فى أكتر وقت كان ممكن أكون محتاجاله فيه.
حاولت أتواصل معاه ورفض ومن يومها ما أعرفش عنه حاجة

أنا مخنوقة جدا ونفسي أتكلم مع حد بالرغم من إن عندى صحاب كتير جدا،
ولكن بشعر دايما بالوحدة وإن محدش هـ يفهمني،
فكرت كتير أروح لدكتور نفساني بس بكون خايفة،
فبدأت أتكلم مع نفسى وأرد عليها، وكأنى شخص تانى لحد ما اتخنقت.

في حاجة بـ توجع
حاجة ضيَّعت إحساسي بكل حاجة
حتى أقرب الحاجات لقلبي بطَّلت أعملها
بقيت بـ عمل كل حاجة لأنها مفروضة عليا