أنا قضيت عشر أعياد وعشر مناسبات في السجن
بـ يبقى من يوم الوقفة بالليل حزن على الجميع
يعنى بالنسبة للعنبر اللي كنت فيه كله بلا استثناء
كله بـ يبقى حزين من بالليل لغاية يوم العيد الصبح
كله بـ ينام نوم جامد عشان محدش يكلم حد ويقول له: "كل سنة وانت طيب"
كلمة كل سنة وانت طيبة دي هناك ما بـ تـتـقالش، بـ تجدد أحزان كتير
بـ نفتكر ولادنا يا ترى في الوقفة عاملين إيه؟
لبسوا جديد من غيرنا؟
عملوا الشقة زى ما احنا بـ نعمل؟
مرتاحين؟ طب مبسوطين؟
فى العيد محدش كان بـ ييجي يزورني خالص
كنت أبعت أقول لهم: "محدش بـ يجيلى فى العيد"
يقولوا لي: "صعب إننا نجيلك، صعب إننا نكون في مناسبة ونجيلك المكان ده"
ولا عيد الأم ...
عيد الام ده بالذات بـ يبقى موت بالبطيء
فيه حاجات كتير بس أنا خلاص مش قادرة أتكلم …