أنا جوايا راجل اسمه محمد
بـ يطلع في مواقف كتير
بـ يطلع لما سارة تنزل الشارع لوحدها، أو تنزل مع أصحابها البنات
لما ما تبقاش عارفة تتصرف كبنت
هو شايف إني محتاجاه

ضربته لأني كنت عايز أضرب كل الناس
طلع بعد صلاة الجمعة، ركب عربيته، وبـ يعاكس بنت معدية
خبَّطت على العربية بتاعته
"بـ تعمل إيه؟"
"إيه؟ أنت مالك؟ تخصك؟"

أنا واحد من الناس في حياتي الشخصية
كنت بـ حكم على البنت الـلـي بـ شوفها في الشارع، مثلًا من لبسها
لو شوفت واحدة لابسة لبس مستـفز شوية برضه، بـ قول عليها شمال.

أي حد بـ يعيط وخصوصًا أخواتي الصغيرين دايمًا بـ قول: "بس"
لأن أنا الكبيرة ولازم أفضل قوية وماسكة نفسي،
هم ما ينفعش يعيطوا عشان أنا ما ينفعش أعيط،
لازم أفضل ماسكة نفسي

أنا ولد، ومن صغري عندي موضوع التثدي "كبر حجم الثدي عند الرجال"،
كنت على طول بـ قنع نفسي إنه مش حاجة كبيرة، وكلها كام سنة ويروح،
وللأسف الموضوع ده دمرلي فترة مراهقتي،
ومش ناسي كل واحد وانا بـ كلمه، وهو بـ يبص على صدري.

مش فاكرة كان عندى كام سنة بالظبط، لكن كنت كبيرة كفاية إنى أفهم وأرد ... بس خفت أرد
كنت فى التاكسى لحوالى نص ساعة ما حصلش فيهم حاجة
لما قربنا على الشارع اللى كنت هـ نزل فيه السواق قالى "عايزاه من قدام ولا من ورا؟"

لما كنت بعيط وبابا بـ يضـربنى، كان بـ يضـربنى تانى علشـان بـ عيط. وكان بـ يقولى:
"لو عيطت هـ تتـضرب، علشـان الرجالة ما بـ تـعيـطـتـش".
فكان كل همى وانا بـ تضرب إنى ما أعيـَّطـش.

لو كنت مكانها، كان هـ يبقى عادي لو قعدت كده، أو قعدت كده
محدش هـ يقول لي:
"إيه القعدة المنسونة دي؟"
"ليه حاطط رجل على رجل؟"

لازم تبقى راجل قوي
ما ينفعش تصاحب المدرسين عشان هـ تبقى فرفور
لازم تبقى شاطر
وتصاحب ناس معينة
ويكون عندك علاقات، ومسيطر.

أنا سلبية، وضعيفة، وجاهلة
متغطية من فوقي لتحتي
ضُرَّة على تلاتة تانيين
بـ شتغل في المطبخ طول النهار
وبـ فتح رجلي طول الليل
ده اللي انتم متصورينه عني، مش كده؟