أنا شعري كيرلي، وبحبه جدًا
تعبت من كلام الناس الغبي،
ونزولي الشارع من أوحش الحاجات الـلـي بـ تحصل لي
مغص فظيع كل ما آجي أنزل، مش عارفه ده social anxiety ولا إيه
أنا عندي ثقة في نفسي، وبحب شعري،
وكان نفسي الناس تتقبل الاختلاف

الشارع، الشعر

مرة واحد قريبي كان بـ يزورنا، وفتحت له الباب
قال لي:" إيه راس العبد دي؟"

"شعرك ناعم ولا خشن؟"
على طول بـ سمع السؤال ده من كل الناس الـلـي حواليا
وعمري ما لاقـيـت الشجاعة الكافية الـلـي تخليني أرد عليهم
وأقول لهم: "آه، أنا شعري مش مفرود"
برغم إن أهلي كانوا بـ يحاولوا يقنعوني إن شعري حلو وأنا طفلة،
بس الأطفال في المدارس بصراحة كانوا بارعين في التنمر.

كنا في خروجة عائلية، وتقريبًا مـفـيـش حد ما قـالـش:
"إيه شعرك ده؟
يا بنتي ما تعمليه، بدل ما هو منكوش كده
ولا أنتِ عايزة تـتـعـبـي نظرنا وخلاص؟"
بكل سخرية، من غير ما يراعوا مشاعري.

كنت لما شعري يطول شوية والتمويج يبتدي يبان فيه كله يفضل يقولي:
"يا خروف"
"انت شبه الخروف"
حتي فالبيت بـ يقولوا لي: "روفي"
كنت بحب شعري أوي وهو طويل بس كان لازم أحلق كل شوية عشان ما يبانش إن شعري مجعد

لما كانت بـ تـقـصـه كنت مش بـ عرف أربطه
فبـ يـكون شكله بشع تحت الحجاب في الـيـونـيـفـورم بتاع المدرسة
وكان كل الـلـي معايا في المدرسة بـ يـتـنـمروا عليا علشان شعري، ويقعدوا يلمسوه
لحد ما أمي قررت تخليني أعمله "بـيـرمـيـنـانـت" ودي مادة ريحتها بشعة وبـ تحرق.

ظننت دومًا أنني مُتبناه أو ربما لست ابنتهم….
أنا الأولى بين أخوتي، وُلدت بشكل عادي، قمحية بشعرٍ مجعد (كيرلي)،
ولكن بنظرُه كنت سمراء، قبيحة، ذات شعر أكرت.
وازداد الأمر سوءًا عندما وُلدت أختي بعدي بثلاث سنوات،
وكانت ذات بشرة فاتحة، وشعر ناعم،

أنا مولودة عندي قورة كبيرة، والـلـي زود الموضوع إن شعري خفيف من قدام، وشبه دماغ محمد هنيدي كده قبل ما يزرع شعر
كنت دايمًا بـ لاقي تريقة من قرايبي ومن صحابي فـالمدرسة، ومن أهلي نفسهم
لما بــ لـم شعري لورا، ألاقي بابا يقول لي:
"ما تحطي شعرك علي وشك يا بنتي، إيه القرف ده؟"

من التعليقات الـلـي سمعتها:
"إيه المقشة دي؟"
"يا مجنونة"
"أم شعر يقرف"
"شعرها بلح"
"أنتِ حلوة، بس لو تسرحي شعرك"

أنا مولودة بشعر مجعد طبيعي، وده وارثاه عن جدتي لأمي
باقي عيلتي كلها عندهم شعر ناعم وطويل
طبعًا أنا اتعرضت لمواقف كتير من السخرية والتجريح من الناس كلها
بس أكتر حاجة كانت بـ تـأثـر فيا الـلـي بـ تـطـلـع من أفراد عيلتي.