اتنين من أصحابى حبوا بعض وقرروا يرتبطوا وبعدها بشهرين اتقدم لها …
اللي كنت عارفاه عنه انه متفتح، لكن ابتدي يقولها ما تقفيش مع كذا ولا مع كذا …وهو براحته.
وقبل الجواز لاقيتها بتكلمني وبتقولي انها عايزة تقابلني ضروري …

أنا زي أي شاب في مصر بـ يحلم بـبـيـت، وأسرة، واستقرار.
وبعد الزواج، ربنا رزقني بأحلى بنت في الدنيا، وبعدها الولد
وفجأة، خلاف بيني وبين مراتي - أم ولادي - لاقيتها سابت البيت
ورفعت قضية تبديد منقولات زوجية
ولاقيت بيتي الـلـي بـنـيـتـه بعرقي ودمي أنا، بإيدى بـ فكه مسمار مسمار

مطلقة؟ ليه هي ما تاخدش واحدة من ظروفها؟
تاخد عربية مستعملة، بدل ما تاخد عربية جديدة؟

كنت يا دوب كسرت التلاتين
بس من 15 سنة فاتت،
ما كانش لسه سن التلاتين من غير جواز عادي.
كان كل فرح أروحه لازم خالاتي ولا عماتي يقولوا لي:
"عقبالك يا حبيبتي، ربنا يجبر بخاطرك ونفرح بعوضك"
بنظرة الانكسار دي الـلـي كلكم عارفينها.

من ساعة ما عرفت إنها متعلقة بواحد جاهز وإنهم ناويين يتجوزوا
وانا بشكل لطيف انسحبت واتمنيت لها كل التوفيق
أصل أنا عارف بختي... دايما بـ وصل بعد فوات الأوان

أنا مـا عيـشـتـش طفولتي، أمي شيلتني الطين بدري
إحنا عندنا الحريم تروح الغيط، وتحلب البهايم، وتأكل الطيور
كانت أمي تروح، وترجع تضربني
"ماعـمـلـتـيـش الأكل ليه؟"
العنف المنزلي؛ العنف المبني على النوع؛ العنف الجنسي؛ العنف الجسدي؛ الوالدين؛ الزواج المبكر؛ الطلاق؛ العمل

مبسوطة إني حرقت دم حسن في المحكمة،
كان واقف وشه أحمر لو وقف عليه دبانة هـ يفرقع.
كنت خايفة في المحكمة،
لما القاضي سألني قولت له مش حاسة بتكافؤ بيني وبينه،
أصل حسن كان شكله أكبر من سنه.
الجلسه اتأجلت بس أنا مبسوطة إني حرقت دمه انهارده.
مع إني كنت خايفة، بس حطيت خوفي علي جنب كده.

أول مرة مد إيده عليا كنت لسه عارفة إني حامل يومها،
اتخانق معايا عشان كان صاحبه ومراته جايين يـ تعشوا معانا، وحمَّرت الممبار بعد البانيه.
جابني من شعري لحد البوتاجاز، وقالي إنه هـ يولع فيا عشان يخلص مني.
سِكِت عشان كنت حامل، واتصالحنا.

لما اتخطبت كان بـ يهيني قدام خطيبي،
طب لما انت تعمل كده قدامه ما هو كمان هـ يهيني لما يتجوزنى،
وفعلا هانني.
من أول أسبوع في حياتي خناقات،
كان بـ يعاملني زي ما يكون ابن وزير وأنا بنت الجنايني،
ما هو لقاني بـ تهان من أولها فكمل.

أنا موضوعي ابتدي في 2005
كان جوزي لسه ما اترقاش وعندي 5 عيال أعمار مختلفة
حالتي المادية كانت صعبة جدا لأن جوزي كان موظف بسيط لسه