كنت فى أبو الريش عندى شغل هناك، وانا راجعة على واحدة ونص (يعني ركبت كبوت)
ما كانش في ستات خالص في العربية، فانا كنت قاعدة أول واحدة في الكبوت
أول واحدة من ناحية السلم وواحد واقف على السلم تمام؟
كان بشنب وملتحي
هو بقى واقف مايل كده طول الطريق
وانا لابسة النضارة وحاطة الهاند فري وهو عاملي كده
وايده دي بقى إيه شغالة تروح وتيجي
انا بجى تـنـحـتـله، وكل تفكيري إن هو هـ يخطف منى الشنطة
يا هـ يسحب الموبايل، اتـلبـشت يعنى
بصوا ما رمشّي ولا راح في أي حتة، ولا بص لأي حد في العربية تاني خالص
وانا مفيش غيري بجى بت، وتفكيري عمال يروح وييجي، عمال يروح وييجي خالص
والوقت وقت ضهرية وانتوا عارفين بجى وقت الضهرية الدنيا إيه بـ تبقى مش مطمنة

وانا بفكر بقى هـ عمل معاه إيه
طب أجوله اتلم؟ طب أعمل إيه مش عارفة …
جولت أنا هـ رميه من العربية والله!
كنت لابسة بنطلون، ولابسة الكونفرس تقيل ويعني بجى كل تفكيري أنا لو رميته أنا هـ ترمي كمان
فبقيت أجرب منه حبة، واجرب رجلي
كل تفكيري إن أنا رجلي هـ تجيبه عشان ما أقعش أنا كمان
وبعدين أرجع كده واقول إيه لا يا بت اتلمي
5 دقايق وهـ تنزلي يخرب بيتك انت أمك لوحديها وأخوكي في شغله طبعا

رحت بقى مرة واحدة قولت له:
"على فكرة أنا هـ رميك ماشي! عارف يعني إيه ممكن أرميك!"
والله العظيم ده اللي حصل
قالى: "فيه إيه يا أبله في إيه؟ هو أنا عـمـلتـللك إيه؟"
أنا أول ما لاجيته كده إيه رحت مسكت الشنطة ورحت عليه قلتله:
"أيوا هـ رميك هـ رميك!"
واقسم بالله يا اخوانا انا كنت ماسكة في رجليه مش عارفة أعمل إيه
لاجيت راجل طالع بـ يقولي: "مالك يا أبله هو عملك إيه؟"
قولتله: "مش شايف هو واقف ازاي؟"
والعربية ماشية والناس في العربية يقولولي: "خلاص خلاص بقى يا أبله"
فقلت: "هو كل مرة نـسـكتـلكوا؟!"
أنا ما أعرفش أنا جبت كل ده منين بس كنت مبسوطة خالص