الحلقة الأضعف

الحلقة الأضعف

وزني زاد وانا بـ كبر، وكنت طفلة كل ما طنط من قرايبنا تشوفني تقولي: "أنتِ تخنتي"،
وانا مراهقة ماما كانت بـ تنتقد وزني طول الوقت،
وتلبسني على مزاجها أكبر من سني،
ومحدش خد باله إني كنت منعزلة وحزينة.

بعد كذا سنة قررت أخس، عملت دايت مع دكتورة، وبقيت مظبوطة،
وبـ لبس الـلـي عاوزاه، كنت فاكرة إن مشاكلي في الحياة هـ تتحل لو خسيت، وده ما حصلش.
بعدها تخنت تاني، وخسيت، وتخنت، وخسيت،
بس بقيت أتعامل مع مشاكلي، ما عادش فارق الرقم على الميزان،
عرفت بس إن الرياضة بـ تحسن مزاجي، وبـ لعبها كل ما يتوفر لي وقت.

وانا كبيرة دلوقتي بـ شوف نمط العيلة،
وقد إيه الوزن ده كان مشكلتهم هم مع نفسهم مش معايا،
وأنا أصغر ما كُـنـتـش أقدر أستوعب الناس دي شاغلة نفسها بالوزن ليه
بس هم كمان وزنهم زايد، وعاداتهم الغذائية مش صحية،
وجيناتهم بـ تحفز زيادة الوزن، أنا بس كنت الحلقة الأضعف الـلـي بـ يرموا عليها قلقهم.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر