طول عمري بـ عاني مع نظرتي لجسمي….
كنت في مدرسة منفصلة، بنات بس، وكنت رياضية،
كنت أطول من باقي البنات، وأعرض منهم،
كان دايمًا شكلي بـ يكون مبهدل في الفُسحة من لعب الرياضة،
كانوا بـ يقولوا عليا مسترجلة، وبـ يدوني الأدوار "الرجالي" في مسرحيات المدرسة.
في الكلية الموضوع اتحسن شوية، بس اتشخصت بتكيُّس في المبايض/ PCOS
ده خلى وزني يزيد، وخلاني ما أقدرش أخس بسهولة،
دي واحدة من الأعراض الجانبية للمرض ده.
كنت طول الوقت عاملة دايت، وبـ تمرَّن كل يوم، بس مفيش أي تقدُّم؛
وقتها زمايلي في الشغل بدأوا يتنمروا عليا.
"أنتِ مش متضايقة إنك على طول عاملة دايت ومش بـ تخسِّي؟"
"أنتِ عاملة دايت ليه؟ ما أنتِ كده كده مش بـ تخسِّي".
"شوفت لك صور قديمة كان شكلك فيها جميل، إيه اللي حصلك؟
سيبتي نفسك خالص كده؟"