أهلي حجبوني بدري عشان مشعرة،
هي دي الكلمة الـلـي أمي كانت بـ تستخدمها….
"البت طالعة مشعرة زي عمتها، بختها منيل".
من أول يوم مدرسة لحد حتى ما دخلت الجامعة،
كان كل الهدف من هدومي إني أخبي شعر جسمي،
جربت كل حاجة، بس الناس ما بـ تفكرش إن ده وجع جسماني وعضوي،
ووقت كتير ضايع أوي علي إني أحاول أخلي شكل جسمي زي ما كل الناس عاوزينه.
أهلي كانوا مؤذيين بطرق كتيرة،
بس الكلام، والمنادية باسم عمتي؛
عشان إحنا الاتنين مولودين بشعر في جسمنا "زي الرجالة"، كان مؤلم.
أتمني الناس تفهم إن الجندر مش بـ يحدد كمية الشعر الـلـي علي ضهري،
يعني أنا آسفة والله مهما كان جندري إني عندي شعر على ضهري،
أكتر من ضهر آخر إنسان شوفته بـ يعرف نفسه كذكر.
أنا عندي شعر على جسمي، وما عنديش أي مشكلة نابعة من جوايا تجاه نفسي.