أنا مولودة في السعودية….
وانا صغيرة كنت بـ تعرض لمضايقات؛ لأني سمرا،
وما كانش عندي أصحاب، لأنهم مش عايزين يصاحبوني.
كنت بـ كره نفسي، وعايزة أموت عشان أدخل الجنة،
واتخلق تاني بيضا، وشعري أصفر، وعيني خضرا.
بسبب الرفض كنت وانا صغيرة عدوانية،
وعندي تطلب الحب والاهتمام.
مش عارفة إيه الـلـي ساعدني أتخطى الموضوع،
بس أنا من زمان حبيت سماري، وملامحي،
وعندي يقين إن شكلي هو التعبير الأمثل لشخصيتي.
بس لسه بـ عاني من ترسبات الرفض،
وإزاي أقدر أعمل علاقات وابدأها.
وطبعًا فيه ستايل معين بـ حس جنبه دايمًا بالرفض، والقلق؛
لأنه بـ يفكرني بالشكل الـلـي المفروض يكون هو الجمال.
بس لسه بـ حاول، وبـ عافر عشان أكون مرتاحة وواثقة.