لما دخلت السجن كان عندي عشرين سنة
أول يوم كنت أجري علي برا وأم زكريا تطلع تجري ورايا تجيبني
"إيه يا بنتي فيه إيه هو انت كل شوية تجري"
"أصل جوا بـ يعملوا قلة أدب وبـ يعوروا في الوش"
"مين اللي قال لك كده؟"
"الناس اللي في العربية"
"خشي ولو حد عمل لك حاجة اندهي عليا هـ تلاقيني عندك"
أول ما رحنا السجن دخلونا عنبر الإيراد
(العنبر اللي بـ يستقبل الكل قبل ما يتوزعوا على عنابرهم حسب التهم)
كان فيه ولية مجنونة قاعدة في الحمام لاقيتها لبست الجلابية بتاعتي
فقلت لأما منيرة "أضربها؟"
قالت لي: "هنا سوقي الجنان عليهم هـ تاخدي حقك"
وفي اليوم ده دخلت الحمام
لاقيت واحدة بـ تضربني بالأقلام
وواحدة تانية ضربتني بالرجل في رقبتي،
صوتت، فـراندا قالت لي: "جري إيه يا مرة هي ضربتك بالرصاص"
المهم واحدة تانية قالت لي:"خدي يا بت تعالي اقعدي جنبي، انت منين؟"
"أنا من السيدة"
"بنت مين؟"
"بنت سميرة "
"اقعدي هنا، انت بنت وبنت حتتي"
اشتغلت كل حاجة في يوم واحد
غسيل مواعين، شيلت زبالة، وسلكت مجاري، ومسحت عنبر،
وروحت المغسلة وبقيت أغسل بطاطين وغسيل
كنت شغالة في كل حاجة وما خـلـيـتـش نفسي في أي حاجة
وأمي كنت أقول لها ما تـجـيـلـيـش وما تـجـيــبــي ـلـيـش حاجة
كنت أطلع لها سجاير وحاجات توديها لأخويا في السجن
لغاية ما تميت التسع سنين وخرجت.