كنت شغالة فى سنترال بيشتغل يوم الجمعة
وكنت بنزل يوم الجمعة ده لوحدى، وطبعا يوم الجمعة بـ يبجى كل المحلات اللى حواليا مجفولة
والمحل بتاعى داخل فى ممر مسدود
يعنى أنا فى نص الممر والمحلات اللى فى الممر جمبى بـ تبجى مجفولة
فـ في مرة وانا جاعدة جه ولد يجى 17 16 سنة
فـجالي عايز تليفون فرحت اديته التليفون
انا كنت بجفل عليا الفاترنين كده بجيبهم على بعض بحيث ان الزبون يـبجى برا وانا فى المحل
فا انا وجاعدة كده لاجيت الولد ماسك التليفون على ودنه وشغال يبص لصدري كده ببصات يعنى مش كويسة
ويفضل يعض في شفايفه فانا ادايجت بس خفت انا وحدى
جولت خلاص انا هسيبه يبص زى ما يبص طالما هو بعيد لحد ما يمشى
فضل نص ساعة حاطط التليفون كده على ودنه ويـبص
وانا أشد الطرحة واكمش فى جاعدتى وهو برضه باصص
وخدت بعضى وسكت ولما هو مشى فضلت أبكي
ازاى أنا ما جدرتش أدافع عن نفسى وما جـدرتش أجوله انت بتبص كده ليه
وده بالنسبالى عيل صغير يعنى، حسيت ان انا ضعيفة
وبعد كده ما شـفـتوش تانى إلا الجمعة اللى وراها
فجولت اكيد ده حد عارف ان يوم الجمعة انا ببجى لوحدى
اكيد حد شغال حوالينا انا ما أعرفوش، بص جاصد جاصد
وفعلا جى الجمعة اللى وراها وعمل نفس الموقف
وفضلت انا اتنفخ ابص كده وابص كده علشان هو يمشى مفيش فعملى رعب
فأول ما جه زميلى بعد كده حكيتله فزميلى جالى خلاص انا الجمعة الجاية هنزل معاكي
وما نزلش لانه كان بينام طول النهار ويستلم الفترة بالليل
فجولت لا هو أنا هستنى زميلى هو اللى يدافع عنى انا لازم ادافع عن نفسى
كان فى حديدة كانت ملفوفة ببلاستر كانت لزميلى حاططها فى المحل رحت انا حطاها بين رجلى
وجولت خلاص هو لما ما ييجى المرة دي انا مش هـ سكتله
فبالفعل جه
اول ما جه كده يا دوب بس مسك التليفون ولسه هـ يبـص رحت ماسكة الحديدة وجايمة وراه
هو طبعا استغرب واتخض منى وراح رامى التليفون وجارى
وانا جريت وراه ورحت اتكعبلت وجعت وحدفته بالحديدة خبطت فى رجله
حسيت إن أنا دافعت عن نفسى
جمت من مكانى وشلت الحديدة وجمت جارية وراه فى الشارع عايزة بس إن أنا أمسكه
ما انـتـبـهـتـش لنفسى غير وانا عديت لنص الشارع بعد السنترال
والغريب فى الموضوع إن كان فيه رجاله كتير واجفة بـ تبص علينا
بس مفيش أى حد حاول إن هو يمسكه
ودى بـ تحصل كتير حتى لو حد بـ يعاكس من عربية أكيد فيه راجل أخد باله وممكن يطنش
فمش عارفة هم ساعات بيحسوا إن احنا حق مثلا بالنسبة لهم ولا إيه ما أعرفش

بس بعد الموجف ده حسيت إن أنا مش لازم أسكت على حجي
بعد الموجف ده حسيت إن أنا حد مش ضعيف
وفرحت ان انا عملت كده لان من ساعتها مشفتوش تاني خالص
يمكن لو أنا ما جدرتش أعمل ده كان الموضوع اطور واتعدى عليا في المكان