وانا صغيرة كان شعري تقيل، كنت بـ كرهه من كتر ما بـ يوجعني
وماما بـ تغسله، وتسرحه، وتعمل ضفاير
وما كنتش بـ عرف أسيبه خالص، عكس أختي اللي شعرها كان حلو وناعم
وكنت بـ تضايق من ده طبعًا عشان بـ شوف نظرة "يا حرام" من كل قرايبي،
"إزاي شعرها كده؟"
وانا عندي ١٥ سنة كده، كنت في المصيف، ومسيباه وأنا طالعة من البحر
واحدة أجنبية وقـفـتـنـي، وسألـتـنـي: "أنتِ عاملة الكيرلي ده إزاي؟
احنا بـ ندفع كتير أوي عشان شعرنا يبقى كده"
كنت طايرة من الفرحة، وأختي تقول لي:
"شفـتـي؟ الناس نفسها يبقى شعرها زي شعرك"
من يومها وانا بـحب شعري ومبسوطة بيه جدًا
يقولوا مجعد، يقولوا أختك شعرها أحلى من شعرك، يقولوا منكوشة
آه منكوشة … أنا منكوشة وبـحب شعري جدًا
حتى صحابي بـ يحبوا شعري، وبـ يـقـولـوا لي: "شعرك له شخصية كده لوحدها، مخلياكي مميزة"
ومـسـمِّـيـنـي أم شعر كيرلي.