أول شغل أنزله يعتبر نزلته عند حماتي
"اغسلي، امسحي، اغسلي قمصان محمود"
ولو كلت تقول لك "بص بـ تزلط الرز، ما بـ تـاكـلـوش".

أول ما روحت لهم، كنت ألاقي المواعين دي متكومة بالأسبوع
من تاني يوم جواز "اغسلي المواعين"
"قومى اطبخي للناس الـلـي جايـالـك".

من بعد كده كل يوم، "امسكي الشقة امسحيها، ما بـ نـحـبـش الوساخة"
حتى وانا حامل"يالا، ورانا شغل، اطلعي أكلي البط"
كل ده وبنتها معاها، وما تـطـلـبـش منها كوباية ميه
بعد ما أدخل أنام، يعملوا هـم أكلهم مخصوص، ويـسـيـبـوا لي المواعين.

كنت بـ كبر دماغى، واقول الله يسامح أهلي، هم الـلـي عملوا فيا كده
أنا ما كـنـتـش عايزة آجي البلد دي
كنت عايزة بيت أتحكم فيه أنا، مش حد يتحكم فيا
فى الآخر لما جوزي تعب، وقعد 6 شهور في البيت
حماتي قالت: "مش عايزة حد يقعد معايا، عايزة أقعد لوحدي أنا وبنتي".

ساعتها قررت أنزل أشتغل
أول شغل روحته كان شغل فى جمعية
سألوني: "مؤهلك إيه؟"
قولت لهم: "دبلوم تجارة"، شغلوني في محو الأمية.

دخلت على ناس كتير، وما كـنـتـش عارفة هـ تعامل مع مين إزاي
كنت في الأول خايفة بعد ما مضيت العقد
بس في أول دورة، نجحت اتنين.

أخت صاحبة الجمعية كانت بـ تستغلني
كان القبض 130 جنيه، كانت تاخد الـ 30 وترمي لي الـ 100
ده غير "عندنا زيارة بكره، يالا نـقوم نـنضف الجمعية".

أنا ما بـقـاش عندي ثقة في حد
يمكن عشان حسيت إن كل الناس عايزين يستغلوني زي حماتي.