لما بلغت وبدأ شكل جسمي يتغير،
بدأت أسمع تعليقات من كل الـلـي حوليا على شكل جسمي،
وإني قد إيه تخنت، وتعليقات مهينة ومقرفة على أجزاء من جسمي،
ومن كتر ما اتأثرت بالكلام بقيت ألبس أسود وطويل طول الوقت؛
عشان محدش يضايقني من أهل بيتي، مش الشارع كمان.
لحد دلوقتي بـ سمع التعليقات دي، ولحد دلوقتي لسه في حاجات ما بـ قدرش أنساها،
لكن المحزن إنهم لسه لحد دلوقتي شايفين إن دي حاجة دمها خفيف وبـ تضحك،
وإن من حقهم يقولوا رأيهم في جسمي.
المؤسف أكتر إني بقيت بـ عمل زيهم،
ساعات بـ حاول أمسك نفسي، وما اعملش كده مع حد غيري،
بس ساعات للأسف بـ تطلع مني آراء مقرفة برضه زي الـلـي كنت بـ سمعها.
بـ حاول أعلِّم نفسي أتقبل كل الاختلافات، حتى لو ما اتربِتش على ده.
بس الكويس في الموضوع إني مع الوقت بدأت أحب جسمي،
وأشوف إنه حلو، وألبس الـلـي يعجبني، بعيدًا عن رأي أي حد،
عشان زي ما قولت هو جسمي أنا مش جسمهم،
لما يبقى يخصهم وبتاعهم يبقوا يتكلموا.