في 2013 كنت بـ شتغل مهندسة جودة في شركة،
كنت حامل وقتها،
وبيتي كان في الشيخ زايد بس شغلي كان في القاهرة الجديدة

كنت بـ تحرك كل يوم من بيتي للشغل مواصلات وانا حامل
تعبت جدًا في أول تلات شهور من الحمل
تخيلوا كل حاجة الحوامل بـ يمروا بيها في أول تلات شهور،
وزيدوا عليها كمان ضغط إني أحاول أعدي ده،
وأكون قوية كفاية عشان أبقى شاطرة في شغلي

كل الناس قالت لي إني بمجرد ما أولد، هـ فضّل إني أقعد في البيت،
على إني أروح الشغل
بس ده مش أنا

ولدت ابني واخدت ست شهور أجازة
بعد ما الست شهور خلصت،
كنت بـ سيب ابني عند جدتي الصبح وأطلع على القاهرة الجديدة عشان الشغل
كنت بـ رضعه وقتها
وكنت متعودة أدخل الحمام أملى أزايز اللبن،
وبعدين أخبيها وانا طالعة عشان أحطهم في التلاجة لحد ما أرجع البيت وأقدر أأكله،
كنت متعودة كمان آخده معايا أي سفريات برا مصر متعلقة بالشغل
لأني كنت لسه بـ رضعه برضه وقتها
وجوزي كان بـ يشجعني على ده

بعد كده ابني كبر وراح الحضانة
كنت دايمًا بلبّسه وأأكله قبل ما ألبس أنا شخصيًا
ابني كان الأولوية الأولى عندي
بـ تضايق لما بـ لاقي الناس بـ تفترض إن الأمهات اللي بـ يشتغلوا ما بـ ياخدوش بالهم من عيالهم

بعدها ابني كبر وراح المدرسة
وانا مسكت إدارة المركز الإقليمي للجودة في شركة تانية
ممكن حد يحب يسألني
إزاي كنت بـ قدر آخد ابني من المدرسة الساعة 3:30 وانا شغلي بـ يخلص 5:30
والإجابة هي إني بدأت أدور على حضانة أودي ابني فيها بعد المدرسة من قبلها بسنة،
كل الناس كانت شايفاني مجنونة
بس أنا كنت محتاجة أضمن إن في مكان آمن أقدر أسيب ابني فيه بعد المدرسة
وعشان ربنا كان دايمًا جنبي، عرفت ألاقي مكان بـ يوفر ده

في الوقت ده، بدأت أحضر رسالة الماجيستير في الهندسة
تخيلي إنك تكوني بـ تشتغلي في مكان بـ يحتاج منك تسافر مواقع كتير وتبعدي عن بيتك يومين أو تلاتة
وكمان بتحضّر الماجيستير، وبـ تذاكري للامتحانات، وعندك طفل عنده أربع سنين
تخيلي فوق كل ده، إنك حامل تاني
كنت هـ تقدري تتعاملي مع ده؟

أنا قدرت
كنت بـ ستغل أي ساعة فاضية عندي عشان أخرج مع ابني
كنا بننبسط جدًا سوا
وكنا مرتبطين ببعض جدًا
الموضوع ماكانش زي ما الناس قعدت تقولي، إني مش هـ قدر أهتم بيه لمجرد إني بـ شتغل
ابني متربي كويس، وشاطر في مدرسته، ومدرسينه بـ يحبوه

حملي في الوقت ده كان صعب لأني كنت بـ حاول أعمل ميت حاجة في نفس الوقت
بس أنا بحاول أتجاوز أي شيء بـ حس بيه عشان أقدر أهتم بابني
في 2018 أخدت تقييم كويس جدًا من شغلي، ونجحت في امتحانات الماجيستير
بس لسه قدامي شوية تحديات محتاجة أعديها

امتحانات السنة دي هـ تكون في مايو اللي جي
والمفروض إني أولد ابني التاني بين مايو ليونيو
هل هـ قدر أحضر كل محاضراتي؟
وهل هـ قدر أروح الامتحانات وانا حامل في الشهر التاسع؟

لسه الحكاية ما خلصتش، بس لسه قدامي شوية وقت عشان أقدر أكملها.