أمي والحبوب

أمي والحبوب

"ماما"
"أيوا يا لولي"
"ممكن تـ بُصي كده
مش عارفة ليه فيه حبوب كتير كده في ضهري"
"ورينى كده
عشان تـ بطلي تـ فكري في الولاد، يا قليلة الأدب".

"أفكر في الولاد؟
مش فاهمة، إيه علاقة ده بالحبوب"
"استني بس يا علا، عايزة أشوف المسلسل"
"بس فهميني الأول"
"يا بت أنتِ فاهمة، هـ تستعبطي؟"
"فاهمة إيه بس يا ماما؟"
"بس يا علا بقى"

لأ طبعًا، أكيد ما حكيتلهاش.
أكيد ما كانش ينفع أقول لها إن فيه حد قرصني في طيزي.
جم ولدين على حمار، وعدوا جنبنا،
وقعدوا يقولوا كلام
كنت خايفة أوي على البنات الـلـي معايا.

وهم بـ يعدوا جنبنا، ولد فيهم قرب مني، وعمل كده.
كنت مكسوفة أوي، ومش عارفة أقول إيه،
وما حكيتش لحد،
قولت للمدرس إن فيه ناس غلسوا علينا بس،
ورجعت أوضتي، وقعدت أعيط.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر