ليه عشان هي واحدة ست تيجي، وما تـقـفـش في الطابور؟
ما تقف في الطابور ويطلع عينها زينا؟
أحيانًا ده بـ يغيظني، وبـ تنرفز
من يومين روحت أجيب تذاكر قطر
أنا واقف في الطابور، وقدامي خمسة
ومفيش خمس دقايق، وبقوا تسعة
جم خمس بنات زي العسلات، ودخلوا على الشباك على طول
ولا كأن في بغال واقفين
كل واحد حط قرون وسكت
لكن لو في دكر قرر إنه يتخطى، يعدي الطابور كده
تـلاقي كلنا لسانا يطول، ونطلع ميتين أبوه.
مرة كنت واقف في طابور العيش، والجو حر جدًا
عشان آخد 5 أرغفة
وجت واحدة وقفت، و قالت له:
"عايزة 20 رغيف"، على طول أخدتهم
ويمكن ما سألهاش على الفلوس غير وهي ماشية
ليه بقي؟ عشان مزة
قلت له: "أنا المرة الـلـي جاية هـ آجي لك لابس زيها
عشان تحترمني، وتديني خمس أرغفة".
ومرة وانا في الكلية، كان فيه دكتور
كل ما نروح نسأله سؤال، ما يردش علينا
تروح له أي بنت، يقول لها، ويحكي معاها
أول مرة استحملت، وتاني مرة استحملت
لكن سكشن الكيمياء العضوية أربع ساعات، وفي حاجات ما بـ نسمعهاش
فلما ما رضش علينا برضه، اتخانقت معاه
وقلت له برضه:
"المرة الـلـي جاية هـ لبس لك ست عشان ترد عليا"،
فـقال لي: "طيب، وحياة أمك هـ تشيل الكيمياء العضوية"
وفعلًا، شيلتها 4 سنين.