"مفيش راجل جسمه كده"
أنا مش قادر أتقبل جسمي بالشكل الكافي،
بس ده مش بسببي، ده بسبب أغلب الناس الـلـي حواليا.
بداية من أهلي بقى لحد أصحابي،
والصورة النمطية عن "الراجل"، ومعايير الذكورة أو الرجولة في المجتمع.

أنا نحيف، رفيع، ما عنديش عضلات وسيكس باكس، وجسمي مش فورمة والكلام ده.
كنت في الأول إلى حد ما متقبل الموضوع ده
لأني لسه ما كونتش جسمي، أو من الآخر لسه ما أخدتش القرار إني أروح الجيم.

الفكرة إن إحنا كرجالة في مجتمع زي المجتمع المصري
لازم نمشي على شوية قواعد عشان نبقى "رجالة" فعلًا….
لازم نتكلم بشكل معين، لازم نقعد بشكل معين،
لازم يبقى لينا شكل معين، وجسم معين،
ولو مش موجود الشكل أو الجسم ده، بـ تبدأ تحس إن أنت مقصر، وبـ تبدأ التعليقات السخيفة.

أهلي ناس طيبين، ومش مؤذيين، وبـ يتمنوا لي الخير دايمًا،
ونفسهم إن أنا أبقى في أحسن حال، بس في موضوع الجسم ده بالذات
ما سـلـمـتـش من تعليقاتهم هم كمان….

يعني بسبب جسمي مثلًا، أمي قالتلي أكتر من مرة:
"مفيش بنت هـ تبصلك"،
وكأن البنت ما بـ يعجبهاش في الراجل غير جسمه.
أختي أكتر من مرة اتريقت على إني رفيع، وإن مفيش أي بنت ممكن تُعجب بيا.
أبويا قالي: "أنت لو دخلت في خناقة، مش هـ تعرف تعمل حاجة،
وهـ تتضرب، وهتبقى خول قدام البنت الـلـي أنت ماشي معاها".

ده غير التعليقات الكتير اللي بـ سمعها من معارف وصحاب من نوعية:
"مفيش راجل جسمه كده".
وتعليقات تانية زي: "البنت لو ما عجبهاش شكلك، مش هـ تبص لشخصيتك".
"أنت مالك رفيع كده ليه؟ مين بـ ياكل أكلك؟"
"لو جسمك وشكلك مش حلو، الروح والشخصية الحلوة دي تخليها لأمك".
"أنت محتاج تتخن شوية، شكلك كده وحش".

ده غير التوجه الموجود في الميديا بشكل عام، والسوشيال ميديا بشكل خاص،
الـلـي بـ يبين إن فعلًا فيه إعجاب شديد من الإناث بالذكور الـلـي جسمهم حلو، وفورمة، وعضلات،
وفيه نفور من الـلـي أجسامهم نحيفة أو "عادية".

بشكل شخصي بقى، أنا واخد القرار إني هـ بدأ أروح الجيم،
بس لما هـ عمل ده هـ عمله علشان نفسي، وعشان صحتي،
وعشان أنا عايز كده، مش علشان أي حد تاني.