أول مرَّة عرفت يعنى إيه تحرش، كنت في 6 ابتدائي
أيوة، وعمري ما هـ نسى اليوم ده، ولا هـ نسى شكل الولد.
كنا الصبح، وكانت الشوارع لسه فاضية شوية
كان هو بعجلة، وماشي ورايا
فجأة حسيت بـ إيده على جسمي
ماكـنـتـش فاهمة، بس حسيت إن فيه حاجة غلط، وانا رافـضـاهـا.
لفيت وشي ليه
وجريت وراه بشنطتي بتاعة المدرسة عـشـان كنت عايزة أضربه
وهو كان بـ يجري
فضلت أجري، واجري، وانا بـ شتمه
لغاية ما شوية رجالة في الشارع وقفوه.
سألوني: "عمل إيه؟"
ماكـنـتـش عارفة أتكلم ولا أشرح
فضلت باصَّة ليهم، وجريت من قدامهم وانا بعيط بالدموع.
خدت المشوار لبيتنا جرى وانا بعيط
لما وصلت البيت، ما عرفـتـش أحكي حاجة
فضلت خايفة من الشارع أسبوع
وبمثِّـل إني تعبانة عشان ما أروحش مدرسة وانزل.
أنا لغاية الآن مش بـ مشي من الشارع ده
فات 10 سنين، ولسه بخاف من الشارع ده
وفاكرة شكل الولد، وفاكرة نظرته ليا
ومش مسامحاه
مش مسامحة أي راجل عمل كده في أي بنت.