ساعة ما اتحبست كنت فاكرة إني جوا هـ ضيع
بس لاقيت إني جوا بقيت قوية شوية
بـ عمل أي حاجة عشان ما أحتاجش لحد
كنت بـ شيل على البوابة، واشتغلت في الحوش نضافة، واشتغلت في المطبخ
الناس كلها كانت بـ تقول لي: "مش هـ تقدري"
عشان أنا برا كنت عايشة عيشة حلوة ومرفهة من بيع المخدرات
الشغل برا مش بهدلة، بالعكس جوا هو الـلـي بهدلة.

كنا بـ نمشيها النهارده عندي، بكرة عندك
كنا بـ نعدي على بعضينا
"هاتي سجارة يا فلانة"
وفلانة تقول لي: "هاتي سجارة"
لو في لقمة بـ نعملها سوا، ممكن نعمل غديوة
لما تـضيق بينا أوي، كنا بـ نستنى الأُذُنَات -ده اسم الحلل الـلـي بـ يكون فيها الأكل-
ناخد منها أول ما بـ تنزل
بعد كده بـ تبدأ تـتركن، والفار ينزل عليها، وتبقي وباء.

جوا كنا بـ نغسل المواعين بخرطوشة في الشهر
كنا بـ نـقـضـيـهـا بالحب والتهريج
والـلـي يغسل، والـلـي يشطف، وبـ نعديها.

أصلها لازم تعدي، بالطول والعرض، لازم تعدي
في مكان زي ده، لازم تعدي، ولازم ما تـحـتـاجـيـش لحد.

جوا السجارة بـ تذل
مش أي حد تاخدي منه السجارة، ومش أي حد تديله السجارة
مش أي حد تقولي له معاكي عيش زيادة
إحنا كنا بـ نعافر عشان نجيب عيش زيادة
وكنا بـ نشتري من السجانات بعلبة سجاير
أنا كنت ممكن آكل رغيف عيش الصبح، ورغيف عيش بالليل، ما كانـتـش بـ تفرق معايا.

جوا الستات هي الـلـي بـ تخلق لنفسها كرامة
الشغل جوا تشغيل دماغ
بس فيه ناس بـ تشغل دماغها على النسوان
وفي نسوان بتاعة شقاء، ما تعرفش حاجة غير الشقاء
عمومًا طول ما أنتِ صامدة تقدري تقفي في أي حاجة
مفيش حاجة اسمها قادرة ومش قادرة
الست هي الـلـي بـ تعمل كل حاجة
هي الـلـي تعيـش نفسها حلو، وهي الـلـي تعيـِّش نفسها وحش.