كنت بـ اشتغل على البوابة عند المأمور
كنت آخد على 10 شِيَل خرطوشتين سجاير
بـ يجيني من الناس الـلـي بـ تزور حاجات -كانز وكده-
لحد ما اتحاكمت
الظابط قال لي: "أخدتي إيه؟"
قولت له: " 6 سنين"
قال لي: "هـ اسألك على حاجة أنتِ كنتِ بـ تبيعي؟"
قولت له: "أيوا،
بس ساعة ما أخدوني كنت موقفة عشان كنت حامل
بس المكتب ما كانش عايزني أوقف، الظابط الـلـي كان مشغلني كان عايزني أكمل"
قال لي: "طب تشتغلي؟"
قلت له: "آه"
قال لي: "هـ تقدري؟"
قلت له: "أقدر"

بقي يشغلني في الحوش عند البلاط في أوضة الزيارة
ونظافة المكتب، وأوضة المأمور
وبقيت عايشة تمام
بـ اشتغل الشغلتين
وبقيت أحوش.

وقعد جوزي ما يزورنيش 3 شهور بعد الحكم
محدش جاني، ولا حد جاب لي فرشة
الأول كنت بـ نام على الأرض، وحاجتي في شنطة بقفل
وبعدين استلمت سرير في الدور التالت، وعملته سوبر ماركت
الكانزات لوحدها، الشيبس لوحده وشايلاه للعيال.

لما جه جوزي يزورني
قال لي: "إيه ده؟
ده أنا مش لاقي السجارة"
قلت له: "أنت مش بـ تشتغل؟"
"لا قاعد من الشغل، أنتِ جايبة منين الكلام ده؟"
"كنت بـ شتغل، ما أنت ما زورتـنـيـش"
كان فاكر إني كنت شايلة فلوس برا من منظري بالشيبس والنايتي الـلـي كنت شايلاه
قال لي: "مش معقول"
قولت له: "هـ ثبتلك"

فلما الست الـلـي بـ شتغل معاها جت عرفته عليها
وقومتني معاها أشيل واحط كراتين
قالوا لي: "لحقتي تشتغلي؟"
قلت له: "آه، أمال هـ عتمد على مين؟"

حماتي بقى، بدأت قصيدة كفر و"غصب عننا ده إحنا حتى جايـبـيـن لك أكل من الـلـي في البيت"
قلت لجوزي: "أنت تجيني، هـ ديك فلوس تجيب لي حاجات، مروحة وحلل"
جاني تاني
حضرت له 200 جنيه و10 خراطيش سجاير
حماتي قالت له: "كتير عليك ده، خلي لك 3 والباقي يـ تباع"
واديته 100 جنيه يجيب لي عسل ومِش وطحينة
الحاجات الـلـي ما يـنـفـعـش أشتريها من الكانتين
وبعدها خليته مرة يجيب لي حلل، مرة سخان، مرة راديو.

بعدها تعبت من الشيل، لأن جالي الغضروف، واتحجزت في المستشفى
الظابط وهو بـ يمر قال لي: "مالِك"
قولت له: "تعبانة من الشيل"
"تشتغلي في المطبخ؟ تقعدي تعدي حاجات للعنابر؟"

أخدني لمشرفة المطبخ، واشتغلت معاهم لحد ما جيت مروحة
قعدت في المطبخ 3 أيام في الأسبوع
وكنت بـ آخد حتة لحمة، وابيعها بـعـلـبـتـيـن أو 3 علب سجاير
كنت بـ سترزق، بس مش زي الشيل.

جيت علي الآخر ما كانش معايا زي الأول
بس كنت مجمعة قرش عشان الورق الـلـي لازم يـ تعمل وانا خارجة
أما جه جوزي، قولت له:
"أنا احتمال أخرج، بس في شوية ورق لازم يـ تعملوا تقدر؟"
قال لي: "آه"
قلت له: "روح للظابط، وقول له إنك جوزي"
فراح له، والظابط طلب منه أوراق
وقال له: "هي هـ تخرج عفو، حسن سير وسلوك"

خلص الورق وجابه بعد شهر
والظابط قال لي: "هـ بعت فاكس للمصلحة، واعملي حسابك أنتِ هـ تـتـنـدهي الأيام الـلـي جاية"
جيت اتندهت، قالوا لي: "أنتِ طالعة أول الأسبوع"
أمينة الشرطة قالت لي: "اتصلتي بأهلك؟"
قولت لها: "لا، هـ اعملها مفاجأة"
"طب هـ تخرجي كده؟ محدش جابلك عباية؟"
فـ جابت لي عباية جينز، وسابتهالي برا عند الكشك
وقالت لي: "خشي لممدوح بيه قولي له في ناس جابوا لي عباية، وسايـبـنـهـا مع الكشك برا"
بس أمينة الشرطة اتصلت بجوزي، وقالت له إني خارجة، فـ قال لها إنه جي
قالت لي: "أنتِ عايزة تـطبي عليه عشان تعرفي هو متجوز ولا لأ؟"
قلت لها: "لأن أنا عارفة إنه اتجوز"
قالت لي: "بالعقل عشان ما تخسريش عيالك"

لاقيته مستنيني، ولاقيت زمايلي ظبطولي الدنيا، وعملوا حنة وعملوا شعري
قعدنا عند حماتي فترة، وشربت المر
وكانت عايزاني أخلي جوزي يتجوز الست دي رسمي بدل عرفي
قلت لهم: "لا، أنا مُعترضة، هو عايزها تمام، لكن أنا عايزة عيالي
لازماك؟ الله يسهلك بيها
عايزها؟ أنا هـ آخد عيالي تلزمني"
قال لي: "لا، مش لازماني أنا قايلها لما مراتي تطلع أنا هـ سيبك، كل واحد يروح لحاله"