أنا كنت شغالة في المكتبة وكان بـ يجي لي أغلب الناس في الأموال العامة
أنا جوا السجن عمري ما شلت لولادي كانزاية ولا تفاحاية
بس كان ليا واحدة صاحبتي لو جات لها بونباية تشيلها لأولادها
كانت بـ تعمل كده عشان هي عارفة ظروف أهلها
وأنا برضه كنت عارفة إن أهلي ناس غلابة
بس عارفة إن لو أختي جابت لولادها تورتاية هـ تجيب لولادي تورتاية
لما كانوا بـ ييجوا زيارة كنت بـ طلع لهم الكانز العادي اللي احنا كلنا هـ نشربه واحنا قاعدين
هي حاجة واحدة اللي كنت بـ خرجها: السجاير
عشان انا كنت بـ شتغل ووالدي برضه ظروفه على قده
وهو كان بـ يصرف على ولادي في التعليم
امتى تعبت وصعب عليا ولادي أوي لما والدي توفى،
لأن كان عنده كمية حنان مش عند حد
خصوصا ليا أنا ولعيالي
لما توفى بقى ابتديت أفكر، طب أعمل إيه؟ والعيال دي؟