"منكوشة"
"ضاربة شعرك في الخلاط"
"إيه المقشة اللي على رأسك دي؟"
"كارتة"
"شيكابالا"
ما كنتش أعرف الجمل دي أو غيرها ممكن يأثروا فيا لأي درجة
بعد ما فضلت أسمعهم طول حياتي
طول عمري شعري كيرلي جدًا،
بس الناس كانت بـ تشوفه منكوش وشكله وحش ومش مهندم
بالذات أقرب الناس ليا
جدتي من ناحية بابا كان دايمًا معاها فرشة وكريمات شعر كتير
عشان تظبط بيهم شعري المنعكش
كانت بـ تخليني أقعد على ركبتي وتشد شعري جامد لحد ما تسلّكه،
وبعدين كانت بـ تغرَّقه كريم عشان تقدر تعمله كحكة أو ضفيرة،
لحد ما التمويجات اللي فيه تختفي خالص
لما كان عندي 12 سنة، جدتي من ناحية ماما خدتني الكوافير
وأقنعتني إني أعمل شعري سشوار
بس اتفاجئت إنها كانت قايلالهم يعملوه بكريم فرد
بعدها فضلت حاسة بحرقان جامد في فروة رأسي لأكتر من ساعة،
وقلت لها بوضوح إني مش عايزة أبدًا أمر بده تاني
بعدها اتقالي ييجي ستين مرة من عيلتي وصحابي والكوافيرات وناس ما أعرفهاش
إني محتاجة أعمل شعري بكريم فرد أو كرياتين
بس دلوقتي أقدر أقول بثقة إني بـ سيب شعري على طبيعته،
وبـ حاول على قد ما أقدر أستخدم منتجات طبيعية عشان أحافظ على "المقشة" بتاعتي