أنا سمرا، وما أعرفش إمتي بدأت أكره شكلي،
وأصدق من جوايا إني مش حلوة،
بس متأكدة إن أمي وأبويا كمان شايفني مش حلوة،
حتى أخويا بـ يقولي: "أنا رفضت العروسة، دي شبهك".
وماما مرة قولتلها صراحة إني حاسة إني مش حلوة،
وجوزي خايفة يحس كمان كده، ردت، وقالت لي:
"عوضيه بحبك واهتمامك"، كأنها بـ تأمن على كلامي.
قرايبي كمان بـ يقولوا نفس الكلام، وإن تقاطيعي مش حلوة، ومناخيري كبيرة.
اتجوزت، وجوزي مع الوقت بقى بـ يقولي نفس الكلام،
بـ يقولي إن صورتي وانا صغيرة شبه شيكابالا،
ودايمًا بـ يتريق على جسمي، لدرجة إنه زعل إن ابني طلع شبهي،
وبـ يستغرب، وبـ يقولي: "يعني أنتِ فرحانة إنه شبهك؟"
حتى أهله، دايمًا بـ يلمحوا، ويقولوا إني مش حلوة، لدرجة إني كرهت نفسي.
ومن وانا صغيرة كنت بـ بقى نفسي أبقى أي واحدة تانية أمورة،
وبقيت حاسة بالذنب إني مش حلوة، رغم إنه مش بأيدي.
حبيت واحد في حياتي؛ لأنه كان دايمًا متقبلني زي ما أنا، وبـ يدعمني زي ما أنا.