(تم ترجمة القصة من الانجليزية)

أنا تقريبًا كده كنت تخينة من وانا بيبي لسه بـ تعلم المشي.
وعشان ده طبعًا ما كانش سبب كافي إنه يخلي حياتي بائسة،
أختي التوأم كانت رفيعة جدًا.

من وقت ما كنت في الحضانة، ويمكن قبل كده كمان، بـ سمع تعليقات زي:
"أنتِ بـ تاكلي أكل أختك ولا حاجة؟"
أو "أنتِ إزاي تخينة كده وهي لأ؟"
حتى من مدرسيني ومشرفين المدرسة.

لما وصلت سن البلوغ، بدأت أخِس بشكل طبيعي، وقولت الدنيا هـ تظبط.
بعدها بأقل من سنة اكتأبت جدًا،
وبدأت آكل بشراهة ونهم عشان ما كُـنـتـش قادرة أتعامل مع مشاعري، ولا عارفة اتأقلم.
اتشخصت باكتئاب بعدها بفترة قليلة،
ومن وقتها وأنا في خناقة مع الأكل، مع إني اتعلمت أحب نفسي،
أو على الأقل أقبلها.

أقدر أعِد على صوابع إيد واحدة عدد الصور الـلـي وافقت اتصورها طول فترة إعدادي وثانوي؛
عشان كنت مركزة جدًا على قد إيه شكلي تخين.
كان عندي هوس بـ تجنُّب المرايات، وكنت بـ ستحمى والنور مطفي؛
عشان أتجنب على قد ما أقدر إني أشوف شكلي عامل إزاي.

وبدل ما استمتع بالخروجات والحفلات، كرهتهم وتجنبتهم؛
عشان كانوا دايمًا بـ يفكروني بقد إيه أنا بكره جسمي.
كنت دايمًا بـ حاول أختار هدوم تغطي جسمي،
وعمري ما عملت شعري ولا حطيت مكياج،
كنت بـ حس إني هـ حط روج لخنزير.
فيه وقت في حياتي كنت رافضة فيه أعتب ناحية البحر أو البيسين،
واتجنبت لبس المايوه لسنين.

أنا دلوقتي في الجامعة، واتحسنت شوية،
لسه تخينة، ولسه بحاول أخس، والاكتئاب مش بـ يساعد،
بس اتعلمت إني ما أخليش مخاوفي تضيع عليا حياتي.

قضيت سنين من حياتي بكره نفسي عشان تخينة،
ما عنديش أي صور ليا في ثانوي،
ولا صور ليا في حاجات حضرتها،
ولا في أجازات أخدتها في الوقت ده.

ماما اتوفت وانا عندي 16 سنة، كان عندها سرطان….
وما عنديش صور كتير ليا في وقت المراهقة،
ولا صور معاها بسبب تفكيري في شكلي.

مش مهم خالص تشوفني حلوة أو جذابة،
عشان أنا نفسي مش بـ شوف نفسي حلوة،
بس كسم أي حد بـ يتسبب في معاناة بني آدم زي ما أنا عانيت، سواء بشكل مباشر أو غير مباشر،
كسمك لو أنت السبب الـلـي خلى طفلة عندها أربع سنين تشوف نفسها وحشة.

ضيعت سنين من عمري بكره نفسي بسبب شكلي،
وهـ فضل طول عمري أفتكر وجع الفترة دي من حياتي
مع كل مرة أدور على صور جديدة نسبيًا ليا مع أمي وما ألاقيش ولا واحدة.

لو بـ تفكر إن التنمر على الناس بسبب وزنها حاجة هـ تساعدهم،
وتشجعهم يخسوا ويبقوا صحيين أكتر،
فأنا كنت مكان الناس الـلـي بـ تقولهم الكلام ده،
وبـ قولك إنك عمرك ما هـ تبقى السبب في إن الناس تبقى صحية،
أنت بس السبب الـلـي خلاني وأنا عندي 12 سنة بـ بص على إزازة مضاد الاكتئاب
وانا بفكر إن الدوا حتى لو ما ساعدنيش أتحسن،
فعلى الأقل هـ يسد نفسي ويخليني أخس.