من صغري مش بـ عرف أنقي لبسي إنه يكون على الموضة، وابقى فاشونيستا بقى وكده،
كنت بحب الـلـي يريحني، والـلـي أحب لونه، وكنت بحب إن لبسي يكون طويل،
وكمان مش بحب أحط ميك أب، فـ كانوا أهلي دايمًا يقولوا لي:
"شكلك شبه الشحاتة"
"هـ تعنسي؛ عشان محدش هـ يبص في وشك"،
"مش هـ آخدك معايا، أنتِ ذوقك وحش"،
"لبسك بـ يبان أحلى لما حد غيرك يلبسه"،
"شكلك وحش جدًا"، -ونكون في خروجة أو مناسبة حلوة-
كلام من هذا القبيل.
كنت بتضايق جدًا، وكانوا بـ يعتبروا إن ده هزار،
ومش من حقي أزعل من هزار، والهزار ده مبني على حقيقة يعني.
لكن محدش عمره فكر إن دي حريتي، واختياراتي،
إني مش بـ ميل لإظهار الشكل، وإني أبقى بنوتة، ومثالية تمامًا.
فقدت الثقة في نفسي بسبب كلامهم لفترة طويلة،
وكان دايمًا عندي قلق تجاه شكلي، وملامحي، وجسمي؛ عشان أنا وحشة،
فـكانت الأمور بـ تزداد سوءًا، بس بقيت بـ سمع الـلـي أسمعه، كإني ما سمعتهوش،
وبقيت لما أبص لنفسي في المراية، بـ شوفني شكلي حلو، وأمورة، غير زمان لأن محدش قال لي كده.
دلوقتي بعد ما عملت وقفة مع نفسي، ثقتي زادت،
وبقيت بـ عمل الـلـي عايزاه، وأي تغيير بـ يبقى مبني عن اقتناعي بيه،
وعن حبي للتغيير ده، وبـ رفض أي رأي، أو أي حاجة،
المفروض إني أعملها just to keep up with the others .