أنا بكره شكلي جدًا جدًا، والموضوع ده خلى ثقتي في نفسي معدومة….
أنا شبه ما أعرفش حاجة عن الثقة بالنفس،
وأنا أصلًا عندي مشاكل مع موضوع الأكل وكده،
وإن مفيش شهية أوقات كتير جدًا، وبالتالي ده مُنعكس على وشي،
بـ يكون رفيع، وشاحب، وما بقاش فيه حاجة في وشي غير مناخيري،
وتعليقات بشعة، وبصَّات شفقة وحشة جدًا جدًا.

دخلت في فترة اكتئاب طويلة جدًا أثرت جامد على شكلي….
فيه مرة كُنت لابسة عباية سمرا في الشارع،
ومرات خالي شافتني، راحت قالت لخالتي:
"بنت أختك ماشية في الشارع ولابسة مشنقة".

نظري ضِعِف، واضطريت ألبس نضارة، لاقيت تعليقات إني فيها شبه الراجل،
وإني ما عنديش وش مليان عشان النضارة تكون كويسة على وشي، فـ قلعتها.
وكُل مدى نظري بـ يضعف، وانا هـ موت والبسها،
بس فعلاً بقيت أحس بإحراج كبير من شكلي.

وانا مش بـ حُط ميك أب، ومش عايزة أحطه،
بس أصحابي بـ يقولوا لي: "ابقي حُطي؛ عشان وشك شاحب أوي وأصفر".
وصل بيا الموضوع إني ما بـقـيـتـش عارفة أروح الجامعة،
ولا بقيت عارفة أبُص في وش أي ولد؛ عشان خايفة يتريق على شكلي،
ويحسسني إني مش زي البنات الجميلة الـلـي بـ يشوفهم،
ومُستحيل أقعد جنب ولد في مُحاضرة، عشان بقيت أخاف منهم.

والله بـ خاف أتخانق مع أي بنت،
عشان ما يوصلنيش كلام إنها قالت عليا كلام عابت فيه على شكلي.
مش بـ تصور أبدًا أبدًا، وحتى أصحابي الـلـي بحبهم بـ يتحايلوا عليا ناخد صور،
تبقى ذكريات لينا مع بعض وانا بـ رفض وانا زعلانة جدًا.

حبيت ولد جدًا جدًا، وكنت مفهماه إننا أصحاب وأنا أصلاً كنت بحبه،
وكنت دايمًا بـ حاول أقطع، وابقى غشيمة في كلامي شوية،
عشان أنا كنت خايفة في يوم أقوله، وهو ما يـقـبـلـنـيـش لأني مش حلوة زي باقي البنات،
ولما كان يقولي نتصور مع بعض كنت بـ رفض جامد،
وكل مرة على الحال ده.
لحد ما في يوم أسود اعترفت له، وهو قالي إن إحنا صُحاب مش أكتر،
حسيت إني حقيرة أوي، وإن عمري ما فيه حد ممكن يُعجب بيا.

أنا مش عارفة أتقبل شكلي،
ولو روحت الجامعة وانا راكبة العربية، بـ قفل ستايرها،
عشان بـ تحرج جدًا إن حد يشوفني من الـلـي راكبين عربيات تانية.
أنا حقيقي حقيقي عايزة أي نوع من المساعدة.