أنا بنت على ولدين….
من زمان وانا زي ما بـ يقولوا "غشيمة في تصرفاتي"،
بس أهو، بنت على ولدين، هـ عمل إيه يعني؟
أكيد كان وارد إنه أطلع كده.
من وانا صغيرة والناس بـ يعاملوني على إني ولد،
وكنت عادي مش بـ زعل؛ عشان الصراحة حاجات البنات دي ما كانـتـش بـ تشدني أوي.
بس لما كبرت بدأت أتغـيــر،
وابقى عايزة إني أحب واتحب و كل الكلام ده،
بس كان دايمًا الناس شايفاني صاحبهم الولد،
لدرجة إن لما بدأت أغيَّر في لبسي والبس لبس بنات
الناس كانت دايمًا بـ تعلق بـ "إيه ده؟ مش عوايدك يعني،
فيه سر ورا اللبس ده ولا إيه؟"
مع إنه كان عادي يعني، أنا كبرت، وانا بنت، وإن أكون بـ لبس اللبس ده، فده الطبيعي.
الفكرة إن الموضوع ما وقفش عند صحابي الـلـي يعرفوني من زمان وشافوا مراحل التطور،
هو أنا حتى لما صاحبت وحبيت، هو نفسه كان بـ يعاملني أكني واحد صاحبه،
لدرجة إن لما كنت بـ زعل من حاجات بـ يعملها -زي أي بنت-،
كان بـ يبقى الرد: "مالك فيه إيه؟ ما تنشفي كده" .