أنا بنت قمحاوية، ومفيش في ملامحي حاجة مميزة، زي شكل المصريين العادي….
بشرتي دهنية، ومن سنين المراهقة وانا بـ عاني مع حب الشباب.
ومع نقص توعية، ما كـنـتـش عارفة أعمل إيه.
وانا صغيرة، طول سنين المدرسة وانا بـ تعرض لمضايقات….
"اغسلي وشك بقى، بلاش وساخة"،
"أنتِ شبه فلانة، بس هي أنضف"،
دي عبارات كانت بـ تتقالي من زمايلي، حتى عيلتي وأمي،
كانوا بـ يعلقوا نفس التعليقات عليا.
ولما اتجوزت، وسافرت مع أهل جوزي مصيف مرة،
راجل كبير على البحر كان قاعد على شمسية ورانا،
وقرر إنه يحرجني قدام أهل جوزي، وقالي بالحرف:
"إحنا كان عندنا واحدة زيك كده، عندي ليكي وصفة ممتازة".
وحتى لما لفيت علشان مش عايزة أسمعه، أخو جوزي فضل واقف يسمعه،
ويرد عليه هو ومراته، كأن عندي جرب، ونفسهم يلاقوله حل،
بحجة إن "ما ينفعش نحرج راجل كبير".
أنا نفسي أعرف، هم ليه فاكرين إني مش شايفة الـلـي في وشي؟ أو ما بـ حاولش أعالجه؟
ليه لازم كل الناس يبقى ليها رأي في شكل وشي كل يوم،
حتى لما يبقى رايق لازم يحسسوني قد إيه كان جربان، وفرق،
نفسي كل واحد يخليه في حاله.