أنا شخص عشريني مُحطم نفسيًا؛ بسبب تنمر أشخاص بحبهم على شكلي….
أنا مش أسمر، ومش أبيض البشرة،
طويل بس جسمي مش رفيع أو مش متناسق بشكلٍ ما.

فيه شوية عيوب في شكلي من وجهة نظر بعض الناس الـلـي بـ تصارحنى بده بشكل مستمر،
وده للأسف انعكس على قناعتي الشخصية،
وبقيت أشوف العيوب دي، وده سبب إن ثقتي في نفسي بقت في الأرض.
وما بـقـيـتـش أبُص في المراية عشان ما شوفش نفسي زي ما هم شايفني إلا نادرًا،
في مناسبة أو شيء من هذا القبيل، وبقيت بـ تجنب النظر للشخص وهو بـ يكلمني.

بتعرض للتنمر بسبب مناخيري، ودقني، ووشي….

"مناخيرك كبيرة أوي"، ويَصحُب تلك الجملة ضحكة من النوع السَمِج.
أنا بـ حاول أغيَّر الموضوع؛ عشان ما أخسرش الشخص قائل الجملة.

"دقنك بـ تموتني ضحك، أنت دقنك دي مش هـ تكمل يا ابني؟"
ولهذا السبب ما بـقـيـتـش بـ سيبها تظهر،
وده سببلي التهابات في منطقة اللحية؛ عشان بقيت بـ حلقها كل يومين أو 3 أيام.

"وشك صعب".
وصِلت لمرحلة إني بـ فكر أعمل عملية تجميل للأنف، وزرع لحية.

أنا عارف إني مش وسيم، ومش لازم أبقى وسيم،
أنت كمان فيك عيوب، وانا ما تـَنَـمَّـرتِـش عليك؛ عشان ما أجرحكش ولو بكلمة.
الكلمة الـلـي بـ تقولها بـ تموتني، وبـ تخليني أكره شكلي،
وده بـ يوديني لمنطقة اشمعنى أنا يا رب؟ ما الناس شكلها كويس.

شكراً لكل حد في حياتي شاف عيب في شكلي، وما عقبش عليه، وتقبلني زي ما أنا،
شكراً لكل حد في حياتي سمع حد بـ يتنمر على شكلي، ولم ينساق معه في السخرية مني.
مجموعة الأشخاص الـلـي بـ يتنمروا عليا، ربنا يسامحكم على الـلـي عملتوه فيا.