أنا مش صغيرة، شوفت حاجات كتير،
أنا حاجات كتير اتغيرت في حياتي،
أنا من الطبقة الوسطى، من الناس المستورين الحمد لله.
كانت أول هزة بالنسبة لي وأنا صغيرة، مش صغيرة أوي كنت في ثانوية عامة يعني،
جدتي اتوفت، وهي كانت أمي، وكانت هي كل حاجة في حياتي
وما حزنتش خالص للأسف.
أمي كانت محتاجاني، في الفترة دي ماما اتدمرت، وما أعرفش إيه الـلـي حصل.
اضطريت آخد القرار إن أنا لازم أبقى قوية عشان ماما،
أنا كنت واحدة عندها 16 سنة، وداخلة امتحانات ثانوية عامة وبتاع،
فاللي هو أنا مش هـ عيط لا، أنا أخدت الخبر،
وقعدت 5، 6 سنين ما بـ عيطش، مفيش بقى.
طبعًا ما كانش بشكل واعي لأن ده قرار متخلف.

فبالتالي كل الـلـي كنت بـ شوفه، الـلـي أوقات بـ حسه إنه صح،
وأوقات بـ حسه أنا كنت مضطرة،
إن علاقتي بأمي مش زي علاقات الأولاد بأمهاتهم.
أمي كانت حد تاني، ماما في أوقات كتير بـ شوفها ضعيفة، ليه؟
طب هو أنا مش هـ فضل على فكرة آخد بالي منك.

يعني آه أنا قاعدة معاكي دلوقتي،
بس أنا ممكن ما أبقاش قاعدة معاكي بعد شوية،
3، 4 أيام ولا سنة،
هم بـ يبقوا معتمدين علينا،
واحنا كمان معتمدين عليهم بس مش عايزين نُقرها،
أنا ساعات بـ يبقى عندي حيرة كبيرة هنا.

الأسبوع الـلـي فات مثلًا وهي مسافرة،
اكتشفت إن أنا هي، بـ قول بالظبط كلام ماما، يا اختاي.
بـ نبقى مش مدركين، متخيلين إن إحنا هـ نبقى مختلفين عنهم،
تاني بفلتر في حاجات وبتاع، بس في الآخر ما هم دول الـلـي إحنا شايفينهم.

أنا الحمد لله خدت منحة، وروحت فرنسا، وما أخدتش مليم من أبويا من 10 سنين،
حاسة إن أنا مستقلة الحمد لله، بس في وقت تاني بعد ما سافرت ورجعت،
بابا برضه الراجل الشرقي شويتين، كان مآمن لي هناك،
وهنا ترجعي لما الدنيا تضلم،لا يا حاج أنت فيه إيه؟
أنا قعدت سنتين لوحدي، فـكان في صدمة رهيبة،
الـلـي هو هناك أنا بـ عمل الـلـي أنا عايزاه، ومش معناه إني كنت مقضياها، لأ،
مش معنى إن بابا مش موجود، ما ربنا موجود في كل حتة،
مش هـ خربها هنا ويبقى اسمي قاعدة براحتي،
كان في شوية من الحرية مش هـ نكر.

من وأنا هناك ربنا الحمد لله رزقني، واشتغلت في multinationals
حاجة كده الـلـي هو الناس بـ يبقى نفسها فيها وبتاع،
وكله رزق، والحمدلله زي الفل.
ما لاقـيـتـش نفسي، وسيبت الشغل.
فجأة لاقـيـتـنـي كل يوم بـ تخانق مع بتوع الـ sales،
وكله بـ يسب ويلعن في بعض طول اليوم.

جت بعدها فترة اليوجا،
وما كنتش عارفة إن ده شغفي الحقيقي.
أنا روحت، ولاقيت حاجة بـ عملها بـ تخليني بـ تنفس كويس،
ومبسوطة وأنا بـ عملها ساعة ولا اتنين في الأسبوع.
وقدر ربنا إن المدربة بتاعتي بقت واحدة من أعز صحابي
هي كانت أمريكانية، وبـ تعرف ربنا كويس، وعلمتني صح.
اضطرت إنها تسافر، وقالت لي إيه: "أنتِ الـلـي هـ تاخدي الـحصص بتاعتي"
ما كنتش محضرة للموضوع ده، وكنت لسه في شغلي الأولاني،
حصل إن أنا عملت نقلة في ست شهور، كنت بـ شتغل وبدي حصص يوجا.

قعدت فترة بدي حصص اليوجا وبـ شتغل، والحمد لله الناس ابتدت تشوفني كويسة،
الناس بقت تيجي الحصص ورد الفعل بقى حلو.
بعد كده حصل مشاكل عندنا في الشغل وبتاع، وقولت لأ يا جماعة that's it
لو أنا قايمة الصبح ورايحة عارفة إني مش هـ شتغل، هـ ستحرم الفلوس،
بناقص، هـ قعد في بيتنا معززة مكرمة.

الشغل التاني كمدربة يوجا كنت بـ آخد فيه عُشر الـلـي كنت بـ آخده من شغلي الأولاني،
مفيش مقارنة، ما يقضيش بنزيني
بس يعني شغلي دلوقتي رزقه في الناس الـلـي بـ قابلها،
يعني أنا بـ عمل يوجا و thai massage، درسته في تايلاند من سنتين،
بـ يقلب الموضوع عيادة دكتور نفساني، الناس مجرد إني أحط إيدي عليهم بـ يبعبعوا بقى.

دي حاجات بـ تأثر في البني آدمين، ودي حاجات بـ تأثر فينا،
تخلينا يا إما نهدى، يا إما مشدودين شدة رهيبة.
بس من الآخر حقيقي إحنا محتاجين نهونها على بعض،
إحنا موجودين عشان بعض، والدنيا صغيرة ما تستاهلش.