هو أنا طول عمري قوية
يعني بـ عرف آخد حقي
مش لينة الجانب يعني
بس يعني ما كنتش عارفة إن المفروض كمان أزود الطاقة دي
والمفروض أكون أقوى من كده
كنت فاكرة إن أنا كده تمام.
مرة كنت ماشية في الشارع، والدنيا زحمة
ماشية عادي
فجأة حسيت بحد فـضهري
فجأة لاقيت حد أخدني بالحضن
كنت متخيلة إنه حد أعرفه
بس فجأة الدنيا زي كأنها وقفت،
اللى هو ما كـنـتـش عارفة أميز بسرعة
إيه ده! مين ده!
فجأة لاقيت نفسي في حضن بني أدم ما أعرفوش
اتفزعت
فطلعت أجري بسرعة
بس هو كان خلاص حرك إيده عليا
حسيت إني متضايقة، ازاي يعمل كده؟!
والسرعة ما خلتنيش ألحق آخد رد فعل واتخانق
طب أعمل إيه؟
مالوش حق يمسكني أو يلمسني
ما لحقتش أضرب، ما لحقتش أرد،
ما لحقتش أشتم،
اللي حصل ضايقني وعلمني أكون سريعة البديهة
أكون تاك تاك في ساعتها.
فده بقى يأثر على حياتي العادية بيني وبين صحابي.
بقيت عايشة كأني واقفة على طراطيف صوابعي،
زي القطة يعنى واقفة على مخالب،
اللي هو أى حركة أنا هـ رد في ساعتها يعني.