الخيانة دي ما بـ تـجـيـش غير من أقرب الناس للواحد
أنا بالنسبة ليا الموضوع كان توظيف أموال

ناس كانوا معايا في الشغل اشتغلوا معايا 13 سنة
كانت علاقتي بيهم علاقة زمالة وبيزنس، بـ يدوني فلوس واشغلها
13 سنة بـ نشتغل مع بعض
جينا اختلفنا، الاختلاف مش إن أنا مش عايزة أديهم الفلوس لأ
الاختلاف كان إني عايزة أديهم فلوسهم

الخيانة جت ازاي؟
لما قررت أوقف الشغل وأديهم فلوسهم
اتفقنا إني أديهم فلوسهم خلال فترة معينة
وقلت لهم إني خلاص تعبت وعايزة أكتفي بالفترة دي وأربي العيال

خالي كان مديني فلوس
وقعد تمن سنين مديني فلوسه وبـ تشتغل وزي الفل
كان بـ يعاملني معاملة وزير الداخلية بالنسبة له
كان لما أكون معزومة عنده ينزل معايا تحت ويفتح لي باب العربية
لما قررت أوقف شغل قال لأمي:
"هي ليه عايزة تصفي الموضوع ما احنا ماشيين وزي الفل؟"
راحت هي قالت له بحسن نية:
"أصل هي عايزة تفتح شركة لوحدها وتعمل حاجة لأولادها،
دي كمان اشترت شقة في الرحاب"
بعدها لاقيته بـ يقول لي: "أنا محتاج فلوس عشان بنتي هـ تتجوز"
فقلت له: "هو انت محتاج المبلغ كله مرة واحدة؟"
"لأ أنا عايز نص المبلغ. خلي باقي الفلوس معاكي تشتغل وأنا محتاج نص الفلوس عشان أعمل الفرح"
"طيب احنا النهارده السبت يوم الجمعة هـ جيب لك الفلوس"

وفعلا حصل، يوم الجمعة بعد الصلاة اتصلت به وقلت له:
"يا خالي الفلوس جاهزة"
"احنا نتقابل في كافيه في الدقي"
قلت له "ماشي"
وروحت، ركنت عربيتي وداخلة بـ دوّرعلى خالي وابن خالي
أنا في دماغي إنهم مش عايزين مراتاتهم يشوفوا المبلغ
فعشان كده بـ يقابلوني في الكافيه
المهم لاقيت راجل واقف علي الباب بيقولي:
"هو حضرتك داخلة لحد معين"
أنا استغربت إنه حد بـ يسأل داخلة فين قلت له:
"آه"
"طيب اتفضلي"
لاقيت خالي قاعد في آخر الكافيه ولاقيت ابنه بيقول لي:
"متأسف أوي يا أبلة نوال بابا هو السبب"
واخدوني على المديرية
قابلني عميد هناك من مباحث الأموال العامة
قال لي: "إيه يا ستي انت مزعلة الحاج بتاعنا ليه؟"
"مزعلاه في إيه؟"
"بـ يقول يعني إنك مزعلاه، هو انت عاملة معاه موقف مش حلو؟"
"إيه الموقف اللي مش حلو؟ واحد طلب مني فلوسه فأنا حضرت له فلوسه،
فقال لي: لأ انا عايز نصهم والباقي شغليه، وأنا أصلا هـ صفي الموضوع"
"انت اشتغلتي بفلوس الناس وفي الآخر هـ ترمي لهم فلوسهم؟"
أنا كان معايا المبلغ كنت حطاه في شنطة
قال لي: "احنا هـ ناخد الفلوس دي بس مش هـ نديكي ورق إننا أخدناها"
قلت له: "إزاي يعني"
"هـ نعتبر إن المبلغ كله معاكي وهـ ناخد عليه كله فوايد"
حاجة مش منطقية ومش مفهومة
المهم بعد نقاشات وبعد ما جابوا لي لواءات
وبدأوا يعدوا لي شقق في إسكندرية، وشرم، وعاملة مشروع إيه، وجايبة فيلا
كل الحاجات دي كانوا عايزين يقاسموني فيها
قلت لهم: "الراجل ده له فلوس، خد الفلوس دي والنص التاني في البيت
هـ جيبهم بكرة بأرباح الشهر ويديني الإيصالات"

ما كـنـتـش متخيلة إن الضربة تيجي من قريب أوي
خالي ده كان عايز يدخل معايا مشاركة في الحاجات اللي عندي
قال لي: "انت كده بـ تأكلي عيالك سحت والحاجات دي بتاعتنا"
"يا جماعة أنا لا هـ دفع حاجة ولا هـ عمل حاجة،
الفلوس أهي موجودة ويمضي عليها ورق، وأنا هـ كلم المحامي ييجي يعمل المخالصة"
المهم ما حاسش إنه يقدر ياخد مني حاجة

الكلام ده كان في رمضان من ساعة صلاة العشاء لغاية بعد الفجر
وجالي تاني يوم اعتذر لي
و"أصل أنا محتاج فلوس وانت كده هـ تـضـيـعـيـنـي
وأنا داخل على جواز البنت ومش هـ يبقى معايا حاجة"
قلت له: "مش مشكلتي عايز فلوسك أهي"
دي كانت أول ضربة بالنسبة لي إن خالي ياكل عرق جبيني
خمس سنين شغل
الموضوع مش إني لميت قرشين ونصبت وعايزة أمشي
أتاريه كان بـ يتكتك وكلم الناس اللي كانوا معايا
الناس دي أنا كنت بـ شتغل معاهم من تلتاشر سنة
وعلاقتي بيهم كانت زي الفل
ناس كانت مدياني فلوس وبـ ديهم عائد شهري ومفيش أي مشكلة
وهم مرتضين وأنا مرتضية وبـ عمل قرش

مش هـ ضحك عليكي وأقول لك ما عملتش، لا عملت كتير يعني
وكان عندي مبلغ حلو وكبرت شغلي
ومن حقي لما أوصل لحد معين يبقى لي حاجتي أنا اللي خاصة بيا
أنا بـ تساوي بيهم
إذا كانوا بـ ياخدوا ألف جنيه في الشهر أنا بـ خد ألف جنيه زيهم
لما جمعت مبلغ معين قلت خلاص انفصل
هو أقنعهم إن كل اللي عندي ده هـم لهم نسبة فيه
وكل واحد بنسبة فلوسه

كنا في رمضان برضه وكنت قلت لهم:
"يا جماعة بعد رمضان هـ كون حضرت لكم كل فلوسكم
وأدي العائد بتاع الشهر أهو.
قبل العيد بيوم هـ نتكلم مع بعضينا وحضروا لي الأوراق"
يوم الوقفة لاقيت الرقابة الإدارية بـ تتصل بيا
روحت لاقيت خالي الله يرحمه بقي
مظبط لي مع الراجل بتاع الرقابة الإدارية
محضر محترم ما يخرش الميه
رفضت أمضي على المحضر

قدمت أجازة خمستاشر يوم
قعدت أفكر إزاي أخرج من الناس دي من غير ما تعمل لي مشاكل
لغاية ما اتعمل لي كمين وأنا داخلة الشغل
لاقيت محضر معمول
قلت لهم: "يا جماعة احنا مش هـ نستني لبعد العيد ولا ست أشهر،
هـ ديكم حاجات عينية وهـ نكتب في الشهر العقاري
دي هـ تبقي بمثابة أمانة وهـ نسجل الكلام ده كله لحد ما أكون حضرت لكم الفلوس من السوق. أسلمكم الفلوس تسلموني الحاجات دي"

قالوا لي: "مفيش مشكلة بس احنا عايزين فلوسنا بأرباحها"
قلت لهم: "مفيش مشكلة"
الضربة التانية بقى من جوزي
لأن الشقق والفيلا والعربيات كلها كنت كتباها باسمه
عشان أنا شغالة موظفة في الحكومة
جيت أطلب من البيه الحاجات بتاعتي رفض إنه يدهاني
الموضوع كان ممكن يخلص بمحضر في القسم ...
طلبت منه العقود وورق المبايعة عشان الناس دي تاخد فلوسها
تخيلي قال لي إيه؟ "أصل أنا لما دخلت الشقة لاقيت العقود مسروقة"
طبعا تحت ضغط من أخويا اللي أصغر منه قال له:
"أنا خايف أديها العقود دي الناس تطمع في الحاجة،
والحاجة دي قد المبلغ بتاعهم عشر مرات.
وممكن بعد ما يوافقوا يروحوا واخدين الحاجات دي لنفسيهم ويبيعوا فيها.
احنا نستنى شوية بس ونضغط عليهم"

فطبعا عشان أنا موظفة حكومة فروحت المدعي العام الاشتراكي
وبالفعل سددت 450 ألف جنيه
لكن خالي الله يرحمه راح محرك القضية
بدل ما كان المدعي العام الاشتراكي هو المسئول عنها حركها وخلاها تبع الجنايات
قضيتي بـ يتاخد فيها سنة واتنين وتلاتة لغاية ما يتحكم فيها لأنها قضية كبيرة
لكن أنا اتحاكمت في تلات شهور، أخدت عشر سنين

لما جالي الحكم اتحولت القضية من جنايات لجنح
أخدت فيها سنة، سنة يعني تسع شهور
قعدت قصاد التسع شهور دول ستين شهر….

طبعا مستقبلي الوظيفي ضاع
وجوزي فضل مـُـصر إن الورق بتاع العقود اتسرق

قعدت خمس سنين وخرجت
وبعدها قعدت عند والدتي خمس سنين ما يعرفش هو إني خرجت
يعني في خلال العشر سنين دول ما شافنيش وكنت رافضة إني اقابله
اتضح بقى إنه باع كل الشقق واسترد فلوس الفيلا
وباع كل العربيات وحط كل الفلوس باسمه في البنك
كل ده وطول العشر سنين ما صرفش علي ولاده
قال "ما أقدرش أشيل مسئولية تلات ولاد"
وهم كانوا عند أهلي فأهلي شالوا الليلة كلها
لغاية ما اتصل بالبيت مرة وقال لهم:
"لما تروحوا عند ماما قولوا لها إني عايز أكلمها في موضوع ضروري"

أنا كنت مفهماه إن اللي بـ ياخد عشر سنين بـ ينزل زيارات في البيت
فكلمته: "خير"
قالي: "أصل أنا هـ تجوز"
عشر سنين لا هو شافني ولا شفته، ما بعتش جنيه
عشر سنين ما صرفش على ولاده
حتى ما كانش يعرف هم في سنة كام
قال لي: "طبعا انت عارفة الظروف، أنا عندي القلب ومحتاج حد جنبي
هـ تجوزها عشان تراعيني بـ ستئذنك إني هـ تجوز في الشقة"
قلت له: "مفيش مشكلة شوف هـ تشتري الشقة بـكام والعفش بـكام"
"لا، ما انا كده كده كنت عايش فيها"
"كنت عايش فيها وبـ تستعمل حاجتي وعفشي علي أساس إنك أبو ولادي"
"ما أنا باباهم"
"بس مش هـ تبقى جوزي، أنا مش معترضة إنك تتجوز بس اشتري الشقة واشتري العفش"
"فيه حاجات أنا مش عايزها خديها وفيه حاجات هـ خليها"
"يعني اللي هـ تخليه هـ تشتريه؟"
"لا"
"طيب مش هـ ترد لي حاجتي؟؟"
"ما أنا قلت لك العقود اتسرقت"

تاني يوم جبت عربية نقل وروحت واخدة العفش
كان ابني عنده نسخة من المفاتيح
وروحت مسلمة الشقة لصاحب العمارة وأخدت الفلوس اللي أنا كنت دفعتها
وكلمته وقلت له: "أنا سلمت الشقة لصاحب العمارة شوف لو عايز تاخدها هتدفع له كام، ونتقابل بكرة عند الماذون"
وتخيلي بعد الفلوس اللي أخدها والعيشة كان بـ يساومني على المؤخر

الخيانة مابـتـجـيـش من الناس اللي ما تعرفهمش
الضربة القوية أوي بـ تيجي من ناس قريبين أوي

بس رغم كده علاقتي بـأخواتي كانت كويسة جدا
لما حصلت لي الأزمة ورغم إن هم كمان كان لهم فلوس عندي
بس حتى لما قلت لهم :"طب بيعوا العربية وخدوا جزء" رفضوا
لغاية وقتنا هذا تلاتاشر سنة أهو ومفيش حاجة نقصت كل طلباتي وطلبات ولادي مجابة
في جوازاتهم هما اللي جهزوهم
وأخويا اللي عايش برا لغاية دلوقتي بـ يبعت لي مصروفي

ربنا يسهل وأقدر أجمع المبلغ وأحطه في المحكمة للناس وتتحفظ القضية.
في نيتي إني أسدد المبلغ للناس
لما كلمت أخواتي قالوا لي:
"هـ نحاول نتفق مع الناس وهـ نروح المحكمة عشان يبقى فيه رد اعتبار"
لأن المحامي قال لي ما يـتـعـمـلـيـكـيـش رد اعتبار غير لما تسددي المبلغ

طيب والسجن اللي أنا اتسجنته إيه موقفه
هـ فـضل طول عمري كده شايلة عار إني أنا كنت مسجونة ...