مر سنتين على استقراري في مصر
كنت في واحدة من الدول العربية من وانا صغيرة
وما بـ جيش غير في الأجازات
بس أنا من الصعيد.
في الفترات الـلـي كنت بـ نزل فيها مصر
ما كنتش واعية بأي حاجة حرفيًا من الحاجات
الـلـي ممكن أواجهها لما أستقر في البلد.
كان عندي 14 سنة، ونازلة في الشارع عادي.
كان يوم خميس، والدنيا زحمة، وبالليل
محدش واخد باله من حد.
كنت بـ عدي الشارع عادي،
واحد عدى من جنبي بموتوسيكل، ومد إيده على مؤخرتي.
أنا وقفت لمدة دقيقة عشان أستوعب الـلـي حصل لي
وبـ بص له، لاقيته بـ يبص لي، وبـ يضحك.
المضحك إني كنت لابسة بنطلون من النوع الواسع جدًا.
بعد ما نزلت للجامعة واستقريت
شفت الـلـي عمري ما شوفته،
النظرات، والغمزات.
مش عشان أنا جمالي خارق يعني ولا الكلام ده
99% منهم بـ يحسسـوا الواحدة إنهم عمرهم ما شافوا أنثى في حياتهم.
للأسف، اتغيرت خالص، والكل أخد باله من كده
بـقيت بـ رُد على أي حد يتعدى حدوده بعنف
لما حد يفضل باصص لي، بـ رد له النظرة
وللأسف مفيش حد مشجع من أي طرف، الكل ضدي
الكل ما بـ يقولوش غير جملة واحدة "مش أنتِ لوحدك".
المفروض إنه أنا علشان لوحدي أسكت واقفل بوقي؟