أنا أول مرة أحكي الحكاية دي لأي حد خالص، حتى أقرب الناس،
وحتى طبيبي النفسي ما يعرفهاش،
بـ حكيها وانا زعلان، وغضبان، وبـ كره جسمي.

أنا ولد، ومن صغري عندي موضوع التثدي "كبر حجم الثدي عند الرجال"،
كنت على طول بـ قنع نفسي إنه مش حاجة كبيرة، وكلها كام سنة ويروح،
وللأسف الموضوع ده دمرلي فترة مراهقتي،
ومش ناسي كل واحد وانا بـ كلمه، وهو بـ يبص على صدري.

ومش ناسي لما كنت صغير، كنت مع حد من قرايبي،
كان عنده محل، وكنت بـ ملى ميه من المحل الـلـي جنبه،
والراجل صاحب المحل قرصني من صدري؛ كأنه هزار يعني، وضحك،
بس القرصة غير إنها وجعتني جسديًا، وجعها النفسي كان أكبر،
رغم إن الكلام ده من أكتر من 7 سنين، ولسه بـ شوف نفس الراجل، بس مش ناسي.

ومش ناسي برضه صاحب والدي، من تلات سنين لما قابلته؛ عشان أديله حاجة،
عمل نفسه كإنه بـ ينفض التيشرت بتاعتي من منطقة الصدر،
مش عارف هو عمل كده ليه الحقيقة.

وبـ لاقي ناس كتير بـ تعلق على الموضوع، وبـ آخده بهزار،
بس لما حد من صحابي بـ يحاول يهزر بالتلامس في منقطة الصدر،
أنا بـ بدأ آخد الموضوع بعنف؛ يمكن عشان أحِس بذكورتي،
عشان أحِس إني راجل.

ما أكذبش عليك، أنا حاسس إني مثير للشفقة وانا بـ كتب الكلام ده،
وبـ فكر ألف مرة إني أمسحه؛ لمجرد إني أفكر في أحكام الناس عليا من خلال كلامي.
أنا بـ كره جسمي، مهما حاولت أبين إني قابله، وبحبه، وبـ مشي مش هاممني حد،
بس بصات الناس بـ تضايقني. عارف إحساس البنت لما حد بـ يبصلها كتير؛
عشان كده يمكن أكون اتحطيت في جزء صغير من الـلـي هما بـ يتعرضوا له،
ودي حاجة وحشة أوي، الـلـي بـ يتعرضوله.