أنا فاكرة أول مرة جاتلي البيريود
ما كنتش فاهمة حاجة خالص... ولما جاتلى افتكرت إنى اتعورت
لما قلت لأمي قالت لي جملة واحدة
"خدي دي حطيها في الكيلوت،
ده هـ يحصل لك كل شهر…
وما ينفعش تلبسي أبيض أو أي لون فاتح أحسن يبان حاجة!
وإوعي أبوكي أو أخوكي يشوفوا حاجة"
كنت بقرف من الدم اللي نازل مني
بشوفه زي ما هم بيشوفوه …. دم مش نضيف
دم بـ يخليني ما أقدرش أصلي،
دم كنت بـ سمعهم بـ يقولوا إنه لما ينزل الست ما ينفعش تنام مع الراجل
وكنت بحاول أخبيه …
أخبي إنها عندي
أخبي الـ pads
أخبي البقع اللي بـ تحصل في الهدوم
أخبي الملايات
أخبي نفسي لما بـ تنفخ أول يوم …
وبعدين دخلت في حرب إثبات وجود
هـ شتري الـ pads وهـ رفض إني أخدهم في كيس أسود
هـ حط الـ pads في الحمام لأن مفيش حاجة عيب تتداري
وكده كده كل الناس عارفة إنها بـ تجيلي وبـ تيجي لكل البنات، مش سر هو
بعد الثلاثتين
ما بقيتش ولا عايزة أخبي ولا عايزة أبين
بقت الحاجات كده زي ما هي
وفي يوم لاقيت نفسي بلمس الدم ده وانا بغير من غير ما أحس بقرف
أو أجري أغسل إيدي.
الدم ده مش مقرف
ده دمي أنا