كنت بقرف من الدم اللي نازل مني
بشوفه زي ما هم بيشوفوه …. دم مش نضيف
دم بـ يخليني ما أقدرش أصلي
دم كنت بـ سمعهم بـ يقولوا إنه لما ينزل الست ما ينفعش تنام مع الراجل
وكنت بحاول أخبيه …
أخبي إنها عندي

أنا جتلي البريود وانا عندي 10 سنين.
كنت عايشة في السعودية في الوقت ده،
وكان إجباري في المكان الـلـي عايشة فيه إني ألبس نقاب.
فـ كنت بـ لبس نقاب طول الوقت برا البيت.

كنت دايمًا بفكر ليه الست ما ينفعش تاخد إذن مرضي وهي عندها البيريود. الموضوع بـ يكون مؤلم جدًا وبـ يبوَّظ اليوم كله، والتركيز في أي حاجة بـ يكون صعب خالص.
النسائية، الدورة الشهرية

أنا فاكرة اليوم بالظبط، كان يوم جمعة في شهر فبراير….
أمي كانت بـ تقول لنا من واحنا عندنا 10 سنين،
إن أول ما تيجي لنا هـ نتحجب،
عشان الدين بـ يقول كده، وأنا كان نفسي ما تـجـلـيـش خالص.

ماما وأختي الكبيرة كانوا مفهمني إنها بـ تيجي لكل البنات بس في أوقات مختلفة،
و"ما تـقـلـقـيـش حتى لو اتأخرت"، وجملة ماما الشهيرة
"كل ست مختلفة عن التانية".
ده خلاني أطمن شوية لما لاقيت صحابي مرة بـ يتكلموا مين جتله ومين لسه،
وأنا كنت من البنات الـلـي لسه.

كنت في خامسة ابتدائي،
وكنت بـ شوف ماما كل شهر مع شراء أكل الشهر توزع على أخواتي البنات كيس شكله غريب،
وأخواتي يدخلوا أوضتهم، ويشيلوه،
وما كـنـتـش أعرف المكان الـلـي بـ يشيلوه فيه.
كان جوايا فضول غريب، وفي نفس الوقت ما ينفعش أفتش في حاجات أخواتي من غير إذنهم،

كنت تعبانة بقالي أكتر من شهر، ووجع في بطني، وقريفة طول وقت،
ولما قولت لمامتي ودتني دكتور،
كشفنا وقال لي:
"ما عندكيش حاجة، ظبطي أكلك، وبطلي تاكلي من برا".
بس بعدها بشهر البريود جت لي، في الأول ما كـنـتـش فاهمة إيه ده،

أول ما جت لي الدورة كنت في أولى إعدادي تقريبًا،
كنت ما أعرفش إيه دي، وافتكرت إني اتعورت،
بس لاقيتني مش حاسة بوجع، جريت غسلت هدومي،
وبقى كل شوية الدم يزيد بطريقة مريبة.

أول مرة جت لي كنت في خامسة ابتدائي،
كنت قاعدة على الكمبيوتر، وفجأة بطني وجعتني أوي، ولاقيت دم.
حطيت مناديل كتير، وقعدت أعيط، وبعدها ماما لقيت الشورت،
وقالت لي: "أنتِ ما قولـتـيـلـيـش ليه؟"
ما كـنـتـش عارفة أرد؛ لأني عمري ما كنت مصاحباها، أو علاقتي بيها قريبة.

أول مرة جت لي كنت فاكرة إني اتعورت في المكان الحساس؛
عشان صدمة الدم، وإحساس الوجع كانوا حاجات جديدة عليا.
ما كُـنـتـش فاهمة إيه الـلـي بـ يحصل، ومحرجة جدًا من نفسي وجسمي والـلـي حصل له.
قررت اتعامل مع الموضوع لوحدي تمامًا، أنا كان عندي 11 سنة،