اخواتي في البيت مـحـسـسـيـنِّي إني اتطلقت عـشـان يـ لاقوا خدامة فـ بـيـفـتروا
حتى أخويا قال لهم: "هو عشان الزمن جار عليها ورجعت هنا تاني تشيل كل ده لوحدها؟"
أنا لو في بيتى مش هـ عمل العمايل دى كلها
أنا لو في بيتي هـ خدم راجل وطفلة، مش عيلة بحالها.

في بيتي كنت بـ غسل كل أسبوعين
عند ماما بـ غسل 4 مرات في الأسبوع
زي ما يكون لـقـيـوا حد بـ يعمل فـافتروا.

أخواتي بعد ما كانوا بـ يـيجوا كل فين وفين
دلوقتى بـ يـيـجوا يوم ويوم، هم وعيالهم وأجوازهم
ما بـيـخلُّوش حاجة في البيت على حالها
بعد ما بـ يمشوا بـ رجع أعيد مـ الأول تانى
أنا بكره اليوم الـلـي بـ يـيجوا فيه.
ده غير إنه كلهم مـحسسنى إني فتاة ليل
"بـ تروحى فين؟ وبـ تـتـأخرى ليه؟"
ده حتى بابا لما أختي بـ تـبـقـى رايحة عند أختي التانية
وأنا هـ بقى بـ موت وأروح معاهم
يقول لي: "طب هي رايحة مع جوزها، أنتِ رايحة مع مين؟"
زي ما يكون ذنبي إني اتطلقت من بني آدم كان مـبـهـدلـنـي
بـ يحملوني ذنب مش بتاعي.

جت فى دماغى فكرة ربنا يسامحنى بقى
إنى أموت نفسى ومفيش حاجة رجعتنى عن الموضوع ده غير بنتى
ما هو إخواتى لا طايقنى ولا طـايـقـيـنـهـا
إللى خلانى ارجع إنى قلت
البت لو مت إللى هـ ياخدها يا أبوها يا واحدة من إخواتى
وفى الحالتين مش هـ تطمن عليها

حتي لما جالى عريس ما وافـقـتـش طبعا
عشان عاوزنى أكدب على أهله وأقول إنى بنت بنوت
مع إن هو كان متجوز وعنده عيلين
طب إزاى! وبنتى؟!
لما قولتله كده أخدت فيه صدمة عمرى
خلانى ندمت إنى اتكلمت معاه
قالى: "خلاص تعالى من غير جواز "
عايز يزيط فى الزيطة هو راخر
خـنـقـنـى حتة إن أنا يـتـبـصـلـى البصة دى

أنا عايزة أتجوز آه … مش هـ كدب عليكم
بس نفسى أتجوز جوازة مرتاحة
مرتاحة من كله
راجل شخصية، يحميني مـالدنيا
ويكون مستوى وأعلم بنتى وأدخلها مدارس خاصة
وتطلع كده دلوعة
ونفسى أصبغ شعرى أحمر
فـ أنا عايزة أتجوز عشان أصبغ شعرى أحمر!
عشان وأنا عند أبويا كده مش هيرضى