"ربنا هـ يحاسبني عليك لو أنت كده"
اتضايقت إن أخويا، الـلـي هو أقرب الناس ليا
بـ يتعامل معايا على إني ذنب، وربنا يحاسبه عليه.
كان لازم ألبس آيس كاب زي ما البنت بـ تغطى شعرها كده
علشان محدش يتحرش بيها.
لكن لاقيت الناس لسه مش مقتنعة
"أنت أكيد حاطط آيس كاب علشان مخبي تحتيه شعر"
أنتوا مالكم بيا أصلًا.
موضوع شعري ده خلاني أسيب ناس كتير أعرفها
جيه عليا يوم، أكتر من 20 شخص أعرفهم اتكلموا معايا على شعري
كلهم اتفقوا إني غير طبيعي، أو إن الشعر ده ذنب
لدرجة إنهم كرهوني في العيشة، وخلوني مش عايز أقعد في مصر
أنا اليوم الـلـي بـ نزل فيه، ومش بـ سمع كلمة من حد بـ بقى مبسوط جدًا.
أنا من الصعيد، من قرية وكده
لما بـ روح هناك، مش بـ نزل الشارع علشان شعرى
كرهت البلد، رغم إني بـ عشق حاجة اسمها ريف
بس هم كرهوني في البلد.
أنا كل الـلـي نفسي فيه إني أمشي في الشارع، ومحدش يبص لي
عايز أبقي مش موجود بالنسبة للناس
شعري مش عيب، ومش حاجة غلط.
أخويا كل يوم بـ يقول لي: "احلق، احلق"
كنت بـ قول له حاضر، وانفض له
وبعدين مع الوقت، البيت قلب محمية طبيعية.
بقيت حاسس إن أنا فار وهو دب
وكل شوية يهجم عليا ويقول لي:
"أنت مش راجل"
"ما تـ لبسش شورتات، مفيش راجل ينزل بشورت".