تربيتي كانت مقفولة أوي أوي
حدودي كانت البيت
وعم صلاح السوبر ماركت اللي على أول الشارع
وبس كده.
ومن أول كي جي لحد تانية أو تالتة ابتدائي
كنت مدرسة إسلامية
بعدها حوّلوني لمدرسة حكومية عادية قريبة من البيت
المدرسة دي بقى كان كل الطلبة اللي فيها ولاد البوابين
وكان فيها عيال كبار جدا وعمالين يسقطوا ويعيدوا
وكانوا بـ يروحوا بأمواس تحت لسانهم
وده خلاني مرعوبة من الدنيا بشكل رهيب
خلاني ما أعرفش أتكلم
مش بـ فتح بقي
فـكنت بـ خد ركن في الفسحة واقعد آكل سندوتشاتي
وما كنتش بـ كلم حد ولا حد بـ يكلمني
وفي رابعة ابتدائي كان فيه ولد معانا اسمه سامح
كان ضخم جدا مش عارفة كان كام سنة بس كان كبير،
بدأت ألاحظ إن سامح دايما بـ يقعد جنبي في الفسحة من غير ما يتكلم،
وبعدين بدأ يتدخل لما حد يضايقني ويزقه.
وفي مرة في الفسحة قال لي:
"انا سامح، إزيك؟" ما رديتش، مشي.
وبعدها كلمني ورديت عليه: "أنا اسمي سارة"
وابتدينا نتكلم وبقينا أصحاب لحد ما الفصل لاحظ
وقعدوا يقولوا سامح بـ يحب سارة
وقاعدين تحت الشجرة مع بعض
فانا اتضايقت وبطلت أكلم سامح
لاقيته بـ يمشي ورايا وانا رايحة المدرسة ووانا راجعة
بس أنا قررت ما أردش عشان العيال في الفصل بـ يضايقوني
وانا مش بحبه أصلًا!