الظابط وهو بـ يحقق معايا بقى يشتم شتيمة وسخة
المهم وهو بـ يشتم الدورة نزلت
بـص كده وقال لي: "إيه ده؟"
قلت له: "نزيف"
ما أعرفش ده كان دورة ولا خضة
قال للعسكرى: "روح هات لباس"

لما دخلت السجن، بنتي كانت حامل في تمن تشهر
كنت ربنا ما يـ وريكي، بنتي بـ تولد وانا مش معاها
تعبت، وقعدت في المستشفى بتاعة السجن
فى الأول قعدت خمستاشر يوم، فى خمستاشر يوم
بنتي ولدت وانا بعيد عنها، وفي الولادة كانت تقول:
"لأ، أنا مش عايزة حد، أنا عاوزة أمي"
حماها يقول لها: "طب ماما فين؟"
تقول له: "أمي خدوها ظلم
أمي ما بــ تعملش حاجة"

أختى بقى عملت زيارة خاصة وقالت لي:
"بنتك ولدت وزى الفل، بس المهم أنتِ
ومالكيش دعوة بيها، واحنا كلنا واقفين معاها"

جه عليا العيد، وقعدت يومين مـا أتـغـداش ولا أتـعـشـى
حاولوا يـ طلعوني برا اكشف، قولت لهم: "لأ"
عشان أطلع بـ يربطوا إيدي وكده
فـ قعدت اتعالج في المستشفى جوا، وجالي اكتئاب.
كانوا يضربوني على وشي عشان أنطق
جات لي خنقة كده، كنت عاوزة أتكلم مش عارفة.

جوزي جاله السكر يوم الحكم الـلـي حكموه عليا
أنا كنت شايفاه وهو بـ يقع كده فى قلب المحكمة
المحامين، شوفي أنتِ بقى
أهلي يقولوا له: "في واحدة مرمية عايزين نـ نجدها"
المحامي يقول لهم: "ادفعوا كذا"
جزرونا وقطمونا، وبيعنا البيت الـلـي ساترنا
وفي الآخر ما جاتش من عند المحامي، جت من عند ربنا.

أنا الـلـي عملت النقض من جوا السجن
والنقض الـلـي جوزي كان دافع فيه تلاتين ألف ما جاش
المهم روحت المحكمة، سمعت النقض، وطلعت
براءة.

طب أعمل بيها إيه البراءة بعد ما طفحتوني الدم أنا وأهلى
وبعد ما خسرتوني بيتي، وحياتي، وسمعتي
كان كل واحد أما يعرف إني دخلت السجن يقول:
"هى قـتـلـتـه ليه؟ هى موتـتـه ليه؟"
طب انتوا شوفتوا حاجة؟
انتوا ما شـوفـتـوش حاجة.