عُقدة حياتي هي طولي….
من ابتدائي ودايمًا أول تعليق بـ سمعه من أي حد بـ قابله هو:
"أنتِ طويلة كده ليه؟"
ولو واحدة طيبة بقى، وانا صعبانة عليها، بـ تدعيلي إني ألاقي عريس أطول مني.
أنا طولي حوالي 180….
طول عمري كنت كارهة نفسي، وبـ كره أتصور أو أبُص في المرايا.
ده خلاني دايمًا بـ فكر في كلامهم، وإني وحشة، وطويلة، وتخينة، ومش فيا أنوثة،
دايمًا كنت فاقدة الثقة في نفسي، وبـ دوَّر دايمًا بعيني في أي مكان على حد أطول مني،
ولحد دلوقتي عندي مشكلة في التواجد وسط الناس.
بس الحمد لله دلوقتي قبلت نفسي، وحبيت طولي،
وقبلت إنه بـ يميزني، وبـ عرف أواجه أي حد بـ يتنمر عليا واوقفه عند حده.
والشخص الـلـي اخترته يكون شريك حياتي أقصر مني، وما حـسـيـتـش معاه بأي نقص….
بالعكس عوضني عن كل حاجة كانت ناقصة جوايا،
وفعلًا مش فارق معايا الناس شايفني إزاي، وبـ ركز دايمًا على راحتي النفسية قبل رأي أي حد.