كنت بايتة عند خالتي أنا وماما، وبعدين خالتي دخلت الأوضة عليا انا وبنت خالتي بهدوء،
وقالت لنا إن فيه حاجة بـ تحصل للبنات، وبـ ينزل دم كل شهر منها؛
عشان لو حصلت فجأة وانتوا فى المدرسة ما تـتخضوش.
كنت مصدومة جدًا، ومش فاهمة حاجة، وهي ما شرحتش أكتر من كده.

بنت خالتي قالت: "آه، أنا عارفة الموضوع ده".
فـ ما عرفتش أسأل، وحسيت إن الموضوع معروف، وأنا بس الـلـي مش فاهمة حاجة.
روحت لماما سألتها، قالت لي: "آه فعلًا بـ يحصل"
قولت لها: "طب ولو مش عاوزة ده يحصل لي، أعمل إيه؟"،
ضحكت، وقالت لي: "مفيش حاجة اسمها كده، دي حاجة طبيعية بـ تحصلنا كلنا".

استنيت لحد ما رجعت البيت، وسألت بابا،
قولت له: "خالتي قالت كذا كذا، وأنا مش عاوزة المرض ده يجيلي، أعمل إيه؟"
ولأنه عودنا كلنا إننا أصحاب مش علاقة أبوية بس، هو ودكتور، فـ قعد شرح لي كل حاجة.
قال لي الأول إن ده مش مرض، دي حاجة ربنا خالقها في جسم البنات؛
عشان بعد كده لما تحب تجيب بيبي.

وقعد يشرح لي التبويض، والهرمونات، وبطانة الرحم بطريقة مبسطة جدًا،
ومش مخيفة إطلاقًا، وقال لي اسم الهرمونات دي، ولما نسبتها بـ تتغير بـ يحصل إيه،
والتفاصيل، والأسماء كلها بشكل علمي؛ عشان لو دخلت أدور على جوجل أبقى بـ قرا كلام صح.

وكان بـ يجاوب على كل الأسئلة الـلـي عندي، وبـ يطمني إن مفيش سؤال عيب أو غلط،
ولو سألت في حاجة مش هـ عرف أفهمها في الوقت الحالي،
كان بـ يقول لي: "بصي، فيه حاجات لو شرحتها لك دلوقتي مش هـ تفهميها أوي؛
عشان سنك لسه أصغر منها شوية، فـ استني سنة وهـ قولك؛ عشان تقدري تستوعبي الإجابة، وتفهميها صح".

الحقيقة إن أمي ما كانش عندها القدرة إنها تشرح الحاجات دي بشكل هادي ومبسط،
بس كان عندها القدرة إنها ما تخوفنيش، وتتعامل مع الموضوع ببساطة وهدوء،
وتعرفني إنه تطور طبيعي في حياتي.
وأبويا كان معلمني إن مفيش حاجة عيب، وأسئلة ما يصحش تـتسأل،
مفيش حاجة في جسمنا أو التغيرات الطبيعية الـلـي بـ تحصل لأي ولد أو بنت موضع إحراج،
وموضوع ما ينفعش يتفتح.