اتولدت عندي مشكلة في طول أصابع القدم،
والنتيجة تنمر كتير عليا وانا صغيرة.
وانتهى بإني بقيت أتكسف ألبس حاجات مفتوحة تبين شكل صوابعي،
ودايمًا بـ لبس شراب؛ عشان أتجنب أي تعليقات سخيفة، أو سؤال:
"إيه ده؟ ليه صوابعك مش نفس الطول؟"،
مع علامات تعجب كتير، و"يا عيني، هـ تعملي إيه لما تكبري؟"
لحد ما كبرت، وفهمت إن ده حصل نتيجة خلل لماما في الغدة الدرقية أثناء الحمل،
وبدأت أتصالح مع الموضوع،
بس لسه بـ تجنب إني أظهر صوابعي قدام حد ما أعرفهوش كويس.
الموضوع يبان تافه، بس ساب أثر جوايا، وفضل ملازمني.