حسيت إني كبرت لما اتقدم لي أول عريس
كنت لسه صغيرة، في تانية إعدادى
بعد الجواز بقى، شيلت المسئولية، وكبرت
وبابا كان مفـهـمـنـا إن الجواز ده حاجة بقى مفـيـش بعدها كلام
لا نغضب، ولا طلاق، ولا الكلام ده.

مع إن أنا كان المفروض أتطلق من أول شهر في جوازى
بعد الضرب، والشرب، والحاجات الـلـي ما كـنـتـش اتعودت عليها.
والمشكلة إني أول ما دخلت، حصل حمل
كنت هـ روح فين؟

من أول يوم اتجوزته، اكتشفت حاجات غريبة
شرب مخدرات، وخيانة، وضرب، وإهانة
وكنت على طول أتخانق معاه عشان يقوم يروح الشغل
وما كانـش بـ يجيب قبض، ولا بـ يجيب فلوس
وحماتي هي الـلـي كانت بـ تصرف علينا، بس بالذل.

كنت بـ غضب، واروح لأهلي، بس كنت رافضة الطلاق
عشان خاطر ابني، كنت بـ قول مـا يـتـربـاش بعيد عن أبوه.

المهم قرر بقى يسيب الشركة، ويطلع معاش مبكر
وبابا قعد يتكلم معاه، ما سمعش الكلام
جاب المكافأة 90.000 جنيه، خد منهم مبلغ 35.000 جنيه، وأجر بيهم قهوة
وبباقى الفلوس اشترينا حتة أرض
فتحنا القهوة، وقعدنا أول سنتين حلوين، ووقفت معاه
ووسعنا الشقة وفرشناها
وعملت جمعيات، وأخدت دهب من أخواتي لحد ما عملت الشقة.

جه بعد كده، بدأت القهوة حالها يميل، وتـتـقـفـل باليومين وبالتلاتة
بعد كده، خلص الـ 5 سنين بتوع القهوة
قلت له: "طب اشتغل، هات لنا فلوس"
قال لي: "لأ، ما بـ شـتـغـلـش عند حد".

بعد كده، باع حتة الأرض واشترى توكتوك يـشـتـغـل عليه
والباقى دفعه مقدم شقة للولاد
بعد أول 10 أيام على التوكتوك، عمل بيه حادثة
عملت له شرخ في رجله، والتوكتوك اتـدعك
هو ركب شريحة ومسامير، وقعد شهرين بعدها في البيت
وصرفنا باقي الفلوس بتاعة الشقة على علاج رجله.
الفلوس كلها خلصت، وما بـقـاش معايا حاجة
كل حاجة ضاعت.

جبت فاترينة، وجبت فيها بقالة وحاجات، وقعدت بيهم في الشارع
سنة بهدلة، ونطرة تنزل على دماغي
وابني كان في الإعدادية، وسقانى المرار دروس
جه هو بقى صلح التوكتوك، وأديه بـ يـشـتـغـل عليه دلوقتي.

لكن دلوقتي، أنا بـ لوم نفسي إني من زمان ما أخـدتـش موقف، وما اتـطـلـقـتـش
بس خلاص بقى، بعد العيال ما عادش ينفع
بدأت أتحمل المسئولية من أول الجواز
حسيت إن أنا كبرت، واتحملت فوق طاقتي.