كنت بـ حضر ورشة حركة في الأرجنتين
وأول يوم ليا كنت خايفة أوي
خايفة حد يلمس جسمي
أي حتة في جسمي،
خايفة أطبق مبدأ الورشة في التدريبات وأرمي وزني على حد تاني
كنت حاسة إن أنا تقيلة
أتقل منهم كلهم، بس في الأرجنتين لاقيت المدربة بتقول لي:
"إرمي وزنك عليا"
وأنا بـ قول لها: "خايفة أوجعك"
وهي تقول لي: "لأ ما تقلقيش أنا بحب الوزن!"
كان أول مرة في حياتي أسمع حد بـ يتكلم عن الوزن بطريقة إيجابية
عمري ما فكرت إن وزني ممكن يبقى حاجة حلوة
بس هو في السياق ده في الورشة دي كان كده
الناس لمست جسمي في كل مكان
أول مرة أشوف ده
في البداية كنت مركزة أوي مع جسمي، بس بعد شوية
بقت الأجسام بـ تتقلب
وحسيت إن أنا وهـمّ جسم واحد
وعلى آخر الورشة حسيت إني خفيفة أوي
طايرة
وأول ما بطلت أركز مين بـ يحاول يشلني
حسيت إني أخف
