بقيت أحس إن أنا ما ينفعش أفضل شايل الحِمل كله لوحدي بعد أبويا
أبويا كان موصيني، ولا حد من جدودي، ولا جدي، ولا ستي
ولا خيلاني، ولا أي حد يساعدني.
هو كان كده برضه
الـلـي عايز حاجة مني، أنا عينيا ليه
مش شرط بقى عشان ساعدتك في حاجة تساعدني
أنا مش محتاج حاجة من حد
حتى لو بـموت، مش مستني مساعدة من حد.
حتى فى يوم العزا، كان جدي المفروض يدفع هو الحاجة
كنت 16 سنة
الحمد لله، أبويا مات وانا في جيبي 3 آلاف جنيه
هم بالظبط الـلـي اتصرفوا في العزا
لغاية لما وديناه المنيا، واتدفن هناك، ورجعنا احنا.
فى العزا ولا عيطت، ولا أي حاجة
أنا أصلًا ما ينفعش أعيط
أبويا الله يرحمه ما كانش ينزلني شغل، عشان أركز في حاجة واحدة
أنا حاسس دلوقتي إن أمي مراتي
وأخويا الأصغر مني بسنة، ابني.
أنا بـ زعَّق لأخويا، وبـ نفعل معاه
وممكن أعيط في الشارع بسببه
"يا عم شيل معايا المسؤولية
أنت مش صغير لدرجة إن أنا مثلًا أديك مصروفك"، والكلام ده
أنت أصغر مني بسنة واحدة
فمش هـ ينفع، لازم تشيل معايا
مش تسيبني أنا كده، وتطلب أنت
أنا مش أبوك.
كنت بـ زعَّق له في الشارع بعد ما طلع من المصحَّة
لما لاقيته بـ يقف مع نفس الشباب الـلـي كان بـ يقف معاهم
بـ زعَّق، وبـ بقى خلاص بـ مسك نفسي بالعافية،
عشان ما ينفعش بقى أعيط، عشان أنا راجل، والكلام ده.