طول عمري من وانا في ابتدائي كانوا بـ يقولوا لي إن جسمي مليان،
وإني عندي إمكانيات زيادة في جسمي أكبر من سني،
بحكم إني كنت صغيرة، وإمكانياتي كبيرة.
وبعد ما خلصت ثانوي ودخلت الجامعة، قررت إني أخس،
وأقلل من جسمي، رغم إن جسمي ما كانش مليان أوي،
وكان فيه ناس كتير بـ تقولي جسمي حلو، إلا إني كنت بـ كرهه جدًا،
وده لأن كان أهل بيتي، وقرايبي كانوا على طول يقولوا لي: "يا بطة"،
و"إيه ده كله اللي عندك؟"
وكمان لما كنت بـ نزل الشارع، والمضايقات،
والكلام الـلـي بـ سمعه بصراحة كتر لما كبرت، ودخلت الجامعة.
وأديني خلصتها الحمد لله، بس المضايقات ما قلتش أبدًا، بالعكس، زادت جدًا،
وبسبب المضايقات دي أو تحت مسمى المجتمع "معاكسة"،
خلتني أتضايق، واكره جسمي أكتر من الأول.