إنت رقيقة

إنت رقيقة

كل صحابي بـ يقولوا لي إني رقيقة
أنا مش عارفة دي ميزة ولا عيب
علاقتي بأهلي هادية
بـ نسافر مع بعض، شاطرة في الجامعة
عمري ما عملت مشاكل حتى لما كنت مراهقة
أخويا صديقي. أنا بحب أهلي أوي
بـ حسهم مثاليين بالنسبة لأهل الناس اللي حواليا.
عمرهم ما اتخانقوا.

اتقدم لي شاب لطيف أوي،
أهله ناس كويسة جدا،
نفس المستوى في كل حاجة، تعليم ولغة.
أنا لازم أعترف إني بـ تكسف أوي
يعني مش بـ ستحمل لما واحدة صاحبتي تقول شتيمة قليلة الأدب حتى لو هزار
وشي بـ يحمر وبــ بدأ أترعش.
صحابي فاهمين كده ومش بـ يشتموا أو يهزروا كده قدامي.
أول ما اتعرفت عليه وخرجنا وحط إيده على إيدي اتكهربت
زي ما بـ قول كده، نفس الإحساس

اتخطبنا واتجوزنا
ماما عمرها ما اتكلمت معايا في أي حاجة غير اليوم اللي قبل الفرح
كانت أول مرة نتكلم عن الولاد،
كانت هادية أوي وهي بـ تقول لي ما أزعلـهـوش، واعمل إيه
هو لازم؟ يعني هو أنا المفروض أعمل إيه؟ أنا خفت أوي
الدنيا اللي أنا عارفاها ما فيهاش كده
الناس بـتحب بعض عادي وبس. لكن كده أنا ما أعرفوش!

جوزي جميل بجد، ومش عاوزة أزعله
لما سافرنا شهر العسل ولمسني انهرت من العياط
حاول يهديني وعدت السفرية على خير، أنا بجد بحبه.
هو أنا عمري ما صاحبت طبعا
بس كل أصدقائي ولاد
ده أنا حتى كنت في مدرسة مشتركة
أنا فاكرة جوزي لما كنا لسه مخطوبين ومسك إيدي وأنا اتكهربت
قال لي: "انت بنت رقيقة أوي ومفيش منك كتير"

من كتر يأسي رحت لدكتور أحكي له يمكن يساعد
رحت لأكتر من دكتور بس معظمهم ضحكوا كده وقالوا لي:
"بكره تتعودي"
حسسوني إني بـ تدلع
أنا عندي مشكلة المفروض
ده مستقبلي، مستقبل جوازي،
مشاعري اللي أصلا مش سهل أحكيها لأغراب
يقوم الدكتور يضحك؟

ماما؟ ماما دي قصة لوحدها
هي شايفة برضه إني هـ تعود
هي مش بـ تكلمني كتير أصلا في الموضوع.
هي مش فاهمة إني بـ نام وحواليا كمية مخدات رهيبة،
مش لأني خايفة منه…
بس أنا بـ كون متطمنة أكتر كده.
أنا مش عارفة مين اللي غلطان.
أنا ولا هو ولا أهلي ولا الدكتور ولا مين؟
هو أنا بس بـ خاف لدرجة إني ممكن أدخل في حالة انهيار عصبي من كتر التفكير
يا ترى هو لسه بـ يحبني؟ ولا إيه؟

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر